Online Reporter
Fungai Muderere
INHLANGANISO yeZimbabwe Football Association (Zifa) isihlele ukuthi isekele ukukhula komdlalo wenguqu oweFutsal ezikolo lasemanyuvesi.
Umdlalo lo udume ngelithi yiFive-A-Side njalo udlalelwa ngamaqembu alabadlali abahlanu phakathi, linye ngalinye.
Umgcinisihlalo weZifa Futsal, uPhilani Banda uthe inhlanganiso yabo izimisele ukuthi umhlobo wenguqu lo usabalale.
“Sikholelwa ekubalulekeni kwe-futsal njengoba ithuthukisa amathalenta lokufundisa abadlali ukusebenzisa ndawonye, ukubambana lokunikezwa abasakhulayo okokwenza, endaweni yokuthi bahlale bengenzi lutho,” kutsho uBanda.
Kodwa uyavuma ukuthi umdlalo wabo usebunzimeni, nanko phela balutshwane abawulandelayo. Uthe okwakhathesi kawudlalwa ezikolo lasemanyuvesi.
“Ezikolo zebanga le-primary akulanhlelo zalumdlalo we-futsal.
Kuzikolo ze-secondary, zinlutshwane eziwudlalayo ngoba udlalwa emadolobheni amakhulu, koBulawayo laseHarare. Kwezinye izabelo akula.
“Enye inkinga yikuswelakala kwenhlelo, imali losekelo kubaphathi. Esizakwenza yikuthi sihlala phansi lezikolo, sibophe isinqumo sokukhulisa umdlalo. IZifa iyakusekela lokhu.”
UBanda uveze lokuthi kulesidingo sokufundisa abaqeqetshi, izisebenzi zemahofisini ezizaqhuba inhlelo, kunye lokuhlanganisa onompembe ezabelweni zonke zelizwe.
Uthe ngokuya kwesikhathi, kuminyaka embalwa ezayo, bafuna ukuthi izikolo zibelomncintiswano we-futsal. Kuhlelo lwabo lokusabalalisa umdlalo, besekelwa yiZifa, uBanda uthe bazalandela izigaba ezine:
“Isigaba sakuqala yikufundisa.
Sizasebenza lezikolo lamakilabhu asemphakathini ukwabela ulwazi ngomdlalo. Kusigaba sesibili sizaqina ngokulungisa inkundla. Nxa singaba lenhlanhla yokuthola usekelo kuHulumende lezinye ingatsha, kungaba kuhle.
“Kusigaba sesithathu, yikufundisa abaqeqetshi labonompembe. Kwesokucina, sizaqala ukuqhuba imincintiswano kuzabelo zonke,” kutsho uBanda.
