Online Reporter
Fungai Muderere
INHLANGANISO yeZimbabwe Football Association (Zifa) ibambene leSports Writers Association of Zimbabwe (Swaz), izaqhuba umhlangano wokufundisa intatheli zomdlalo koBulawayo.
Lokhu kuza ngemva kokuqhuba izifundo ezifanayo eHarare ngeviki edluleyo.
KoBulawayo umhlangano lo uzabe useZimbabwe Trade Fair Grounds, eSmall Hall kusukela ekuseni, usiyaphethwa ngehola lesine emini.
Kumbiko owethulwe zinkokheli zeZifa leSwaz kuliviki, kubikwa kuzabuthana intatheli ezisebenza zikumhlubulo ongezansi yelizwe, lapho okuzaphathwa izihloko ezitshiyeneyo, kugoqela izifundo ngemithetho emitsha yebhola lenyawo, ukuphathwa komdlalo njengebhizimusi, ubudlelwano phakathi kweZifa lentatheli, kunye lokubopha amacebo angaphathisa ukuthi kuqhutshwe kakuhle umdlalo.
Kuzagxilwa njalo ekutholeni ulwazi olujulileyo ngeZifa, lokuma kwengalane yobukhokheli, ukuphawulwa kombono weZifa lokufunda ukuloba.
Kuminyaka edluleyo, inhlanganiso yeSwaz izamile ukuthi iphakamise abalobi bomdlalo kanobhutshuzwayo ngokuqhuba izifundo kwezempilakahle. Intatheli zaphathiswa ngokufundiswa yinhlanganiso yeNational Aids Council (Nac) lezinye ingatsha.
