adminSiyadibana njalo bafundi kulolu hlelo lweSiNdebele. Kuviki ezayo abanye benu bazabe bebhala imihloliso yabo yokuphela komnyaka, ngilifisela inhlanhla njalo ngiyalikhulekela lami ukuthi iNkosi, enguSimakade alikhumbuze konke elikufunde kusukela umnyaka uqalisa kuze kube khathesi.
Kodwa-ke bafundi singaze sakhohlwa ukuthi lo lalowo uvuna lokho akuhlanyelileyo kungakho-ke kasibalenini njalo lingakhohlwa ukuthi iphephandaba likaMthunywa lalo lilakho ukuliphathisa kakhulu kumihloliso yenu ngoba sibhala ulimi lwesiNdebele qho njalo olunambithekayo elingalusebenzisa ekubhaleni indaba zenu zokuzibumbela.
Lamuhlanje sizafunda ngendawo ezihlala izinto ezithile. Nxa sikhangelisisa sizathola ukuthi lunye ngalunye lulendawo yalo lapho oluhlala khona, leyo ndawo ilebizo layo. Sikhangela-ke amabizo ezindawo ezihlala izinto ezehlukeneyo.
1. Isibaya senkomo.
2. Isilugu senkukhu.
3. Ixhiba lentombi/lejaha.
4. Intolongo yezibotshwa.
5. Isigodlo senkosi.
6. Umkulu wembiza/imiganu.
7. Isiphala somumbu/samabele.
8. Isidleke senyoni.
9. Isibuya samajodo/amathanga.
10. Ibhanga yemali.
11. Umlindi wenyoka/wesambane.
12. Umthombo wamanzi.
13. Isiziba sengwenya.
14. Isiduli samagenga.
15. Ubhalu lwembila.
16. Indlu enkulu yabanini bomuzi.
17. Isivande semibhida/amatamatisi.
Dinga lawe amanye amabizo ezindawo ezihlala izinto ezithile.
Abantwana bezinto ezithile
Lapha sikhangela abantwana bezinto ezithile ngoba phela labo belamabizo atshiyeneyo. Kuqakathekile ukuthi siwazi lawo mabizo abantwana bezinto ezitshiyeneyo ukuze siwabize ngendlela eqondileyo.
1. Umdlwane wenja.
2. Umntwana womuntu.
3. Itsiyane lenkukhu.
4. Ithole lenkomo.
5. Izithelo zezihlahla.
6. Izinyane lembuzi.
7. Amachaphazi enyosi.
8. Amaphuphu enyoni.
9. Umdlwane wengulube.
10. Ithole lenyathi/lendlovu.
11. Iminoyi yentwala.
Dinga ke mfundi amanye amabizo abantwana bezinto ezithile.
Online Reporter