adminJohas Moyo
ZIZONDE zigane unwabu izakhamizi zeMatopo kulandela isihluku somfana oleminyaka engu-14 odlwengule umntakamakhelwane (8) wamthelela umkhuhlane wesiki, uMthunywa ukuzwile lokho.
Isiga lesi esitshiye uzulu ephuphuma ngolaka sivele kuviki ephelileyo ngemva kokuba unina womntwana enanzelele ukuthi ubengasenelisi ukuhlala kunye lokuhamba okwabangela ukuthi acine emhlola wasebona ukuba umntwana wayehlukuluziwe.
UMthunywa uzwe njalo udletshana lokuthi umntwana lo ubehlukuluzwa ngabafana ababili omunye oleminyaka engu-14 loleminyaka engu-11 lanxa kutholakale ukuba obelesiki ngoleminyaka engu-14.
Kubikwa umsolwa esingeke sachaza ibizo lakhe ngoba eleminyaka engaphansi kwengu-18 wahlangana lomamangala egangeni wamdlwengula andubana amlaye ukuthi kumele kube yimfalayo andubana amthembise izibiliboco ezifana leziwiji kanye lama-jiggies. Esinye isakhamuzi sakule indawo esikhulume loMthunywa ngaloludaba uNkosazana Audrey Malinga uveze ukuthi umntwana lo usebuhlungwini.
“Kangikukholwa ngamehlo ami lokho engakubonayo. Kambe umntwana ongakana abonakale esebole isitho njalo engasenelisi lokuhamba.
“Kukhanya futhi umntwana lo ubehlukuluzwa ngabafana ababili emacansini omunye ole-11 layenalo ole-14, kodwa nxa sesikhangela isimo somntwana kukhanya sivelela kulo oleminyaka engu-14,” kutsho uNkkz Malinga.
Uqhubekele phambili esithi kukhanya ababili laba bebethi bangaya lomamangala emacansini bamuphe iziwiji yikho nje wayengachazi ngokuhlukuluzwa lokhu. UMthunywa uxhumane lomunye wezakhamizi oyisihlobo kodwa ongathandanga ukuvezwa ngebizo yena oveze ukuthi udaba lolu lwaselunyathezelwa kodwa kwacina kubikelwa amapholisa ngoba sekumele aye esibhedlela.
“Umntwana wayesehlaba umkhosi nxa echitha njalo lokuhlala wayengasenelisi okwenza unina wacina emhlola yena wasechaza ukuba uhlukuluzwe ngubani okwenza indaba le yayabikelwa amapholisa,” kutsho isihlobo lesi.
Imizamo yokukhulumisana lamapholisa yehlule ngoba bebengabambi ucingo.
Online Reporter