Online Reporter
Nkosilathi Sibanda
INHLANGANISO yeZimbabwe Volleyball Association (ZVA) iphezulu kokuqhuba izifundo zabaqeqetshi bomdlalo kuzikolo zebanga lePrimary edolobheni leFolosi.
Umgcinisihlalo we-volleyball kuNational Association of Primary School Heads (Naph) uSifiso Buhlungu uthe bahlose ukuqhuba izifundo lezi okwamalanga amathathu ukuze bathuthukise umdlalo wabo ngokunikeza abaqeqetshi ulwazi.
“Sikhuthaza bonke ababalisi ezikolo zePrimary ukuthi benze izifundo kuzo zonke izabelo elizweni.
Sihlose ukukhulisa umdlalo we-volleyball kumabanga wonke. Asigxili ezikolo kuphela. Sifuna ukufundisa labaqeqetshi emphakathini lapho okuphuma khona abadlali bethu,” kutsho uBuhlungu.
Omunye wabaqeqetshi ophakathi kwezifundo lezi uthe: “Siyabonga ngokuthola izifundo ezengeza ulwazi lwethu. Kunengi esikufundayo.
“Sibonga ithuba esiliphiwe yinhlanganiso yeZVA. Kuzenza kubelula ukuthi siqeqetshe, sibe labadlali abazingcitshi.”
Inhlanganiso yeZVA ichaze ukuba izifundo lezi zisekele lenhlelo zikaHulumende zokusebenzisa ezemidlalo ukuthuthukisa lebhizimusi lokuvakatsha.
“Sikhethe idolobho leFolosi ngoba isabelo seMatabeleland North siqakatheke kakhulu kubhizimusi lokuvakatsha. Ngeke sikwenze lokhu sitshaya ukufundisa abaqeqetshi ezikolo lasemphakathini.
“Lokhu kuzadala ukuthi kube lomncintiswano onzima. Njengenhlanganiso sihlose ukuthi singatshiyi umuntu phandle,” ngumsekeli kamgcinihlalo weZimbabwe Volleyball Association uSonny Kgaboe.
Isabelo seMatabeleland North simelwe ngamaqembu amabili kuligi yeZimbabwe Premier Volleyball League, iShalom Ballers Volleyball Club leCrocs Volleyball Club.
