Online Reporter
Sikhumbuzo Moyo
INDLAMANZI zihlalele evalweni elokitshini leNtumbane koBulawayo ngemva kwesehlakalo lapho izigebengu ebezihlome ngamahloka lombhobho zihlasele amabhawa amabili ngoLwesithathu ebusuku.
Izigebengu lezi kubikwa zihlasele ePicknTalk Sports Bar ebizwa ngokuthi koSaMzi lase-Afri Bar koGlad.
Unogada we-Afri Bar uDevine Tsiga uthe izigebengu zifike zalaya abantu bonke ukuthi balale phansi, qede lapho zathi zifuna imali.
“Zihle zaqonda ku-counter ngesikhathi lathi sisazama ukuqondisisa ukuthi kwenzakalani. Omunye wabo uzame ukungigeca ngehloka ekhanda, ngavika ngesandla,” kutsho uTsiga.
Uthe ngesikhathi leso, ezinye izigebengu bezihlasela othengisa utshwala zifuna imali. Kubikwa zimdonsele phandle, zamtshaya amadolo ngehloka, zadubula phezulu.
Zisuka ebhawa le, ziqonde koPicknTalk ezifike zadubula kabili, zalalisa indlamanzi phansi.
“Abantu balandele abakutshelwayo kodwa batshaye inina elithengisayo ngehloka,” kubika omunye walabo abakade bekhona.
Intatheli zifike emabhawa la zabona mathupha igazi ligcwele phansi.
Kusenjalo, kubikwa kudutshulwe elinye ilunga lamapholisa e-Neighbourhood Watch committee eMakhandeni ngoLwesine ebusuku. Kucatshangelwa ukuthi udutshulwe liqula ebelisuka eNtumbane.
Osabambe isikhundla sesikhulumi samapholisa koBulawayo Assistant Inspector Thandekile Ndlovu uthe amapholisa azakhipha umbiko ogcweleyo ngemva kophenyo.
