Online Reporter
Raymond Jaravaza
SEBEHLALELE evalweni elokitshini leMakhandeni koBulawayo kulandela isehlakalo sokuhlaselwa kwezakhamizi ezintathu yizigelekeqe ezihlome ngamabhemba.
Izigelekeqe lezi ziqalise ukuhlasela kusukela ngehola lesithupha kwaze kwafika ihola lesitshiya galombili kusihlwa ngoLwesithathu.
Abantu abahlaselwayo bagijinyiselwe esibhedlela seMpilo, belimele amakhanda, inyawo lezandla.
Ukhansila weMakhandeni uSusan Sithole uthe uzwile ngesehlakalo lesi.
“Kulendoda ebanjwe inkunzi eduzane lenkundla yomdlalo wethenisi. Uhlabe umkhosi, kwasukuma izakhamizi ezigijime zafika lapho. Imuli yakhe imgijimisele esibhedlela,” kubika ukhansila.
Kubikwa abanye ababili bahlaselwe duzane lemavinkilini akoMaunga.
“Sithole omunye esopha kakhulu. I-ambulence ibahambise esibhedlela ngasikhathi sinye. Konke kwenzakale ngendlela ebikhanya iqoqiwe.”
Kumibiko ekuWhatsApp, kulesakhamizi esibike ukuba utshaywe, wathathelwa iUS$10 lezicathulo.
“Iqula lamabhemba selikhona! Bahamba bengamaqembu, begqekeza, bebamba inkunzi. Kubi,” kutsho isakhamizi lesi.
Izakhamizi sezibophe inyathelo lokwengeza ukubonakala kweNeighbourhood Watch Committee, ngenxa yokwanda kwengozi zokuhlaselwa kwabantu.
Kusenjalo, ummeli weMakhandeni ePhalamende uDescent Bajila usecele ukuthi amapholisa aqine ngokubhoda endaweni le, ukuze abantu bathola ukuphepha lokuthula.
Amapholisa asekhuthaze izakhamizi ukuthi zingalaleli ezikuzwa kuSocial Media, ngoba okunengi kungamanga.
