Online Reporter
Lovemore Dube
SEKWEDLULE iminyaka eminengi izikolo ezisesabelweni sakoBulawayo zihlala zisehluleka ukuncintisa kuhle kumincintiswano yokugijima ngaphansi kweNational Association of Secondary School Heads (Nash) kodwa lokho kuzaguquka lonyaka.
Umgcinisihlalo wenhlanganiso le kulesi isabelo, uCain Ncube, ophinda abengumphathisikolo weSobukhazi High, utshele iphephandaba likazulu ngoLwesibili ukuba sebenze konke okusemandleni abo ukuthi lonyaka izikolo zakoBulawayo zithole imendulo zaphezulu.
Kuminyaka elitshumi edluleyo, isabelo sakoBulawayo besiphethe sithatha inombolo zaphansi, okuyinto ebidanisa kakhulu, nanko kusaziwa ukuthi lesisabelo silenkundla ezingcono zokulolongela umdlalo wokugijima.
Kwake kwaba lesikhathi lapho isabelo seBulawayo esasigijinyelwa ngabafundi ababengathandabuzi ukulwela imiklomelo lezicoco zegolide. Inengi lizakhumbula iminyaka yenjabulo lapho okwakugijima khona uCaroline Ncube, Tatenda Goronga, Lewis Banda, Nelton Ndebele, Marvin Bonde, Elvis Mzamo, Sikhulile Sibanda, Xolani Nkiwane, Ishmael Nyandoro loNobuhle Ncube.
UNcube uthe sebenanzelele ukuthi isizatho sokwehluleka kwezikolo zabo kumincintiswano yezabelo kuvela ekuthini abantwana kabatholi isikhathi esaneleyo sokulungiselela lokuzilolonga.
“Sicabange ukuthi sibe lemincintiswano eminengi, silungiselela imidlalo yezabelo ukwenzela ukuthi abantwabethu bathole ithuba lokwengezwa izinga labo, balungise amaphutha kunye lokuthola ukulaywa ngabaqeqetshi. Siqalise ukwenza lokhu kusukela mhlaka 12 Mpalakazi ngomnyaka ozayo,” kutsho uNcube.
Ubike ukuba bazaqhuba njalo omunye umhlangano wemincintiswano esabelweni, behlose ukubumba iqembu eliqinileyo.
“Kuzakhethwa abantwana abamela isabelo ngesikhathi kuncintiswana kuma-inter-districts. Okudanisayo yikuthi zikhona izikolo ezingafuni ukuthumela abafundi abenza kuhle emincintiswaneni, okusibisela emuva kumalungiselelo ethu njengoba siyabe sikhangelele ukuthi abantwana laba babeyingxenye yokuphumelela kwezabelo. Lonyaka sifuna ukuguqula izinto. Kumele siphume lezicoco zaphezulu, ikakhulu igolide.”
