Online Reporter
Brandon Moyo
KULO mqanso ozakhwelwa ngabafana bomdlalo we-rugby abakuleli, amaSables, abazadlala ku2027 Rugby World Cup e-Australia, nanko iZimbabwe ihlelwe ukuthi izadlala leNgilandi, Wales leTonga.
INgilandi liqembu elisindayo ku-rugby njalo likunombolo yesithathu kungalane yamazwe. Laqeda likusigaba sama semifinal enkezo ka2023.
Ama-Sables azabe efika enkundleni zenkezo yomhlaba okwesithathu. Amanye amahlandla lapho iZimbabwe eyaphatheka khona kwakungu1987 lango1991.
Uhlelo lokwabela amazwe amaqoqo lwenziwe ngeviki edluleyo edolobheni leSydney, e-Australia. Ama-Sables, akunombolo yesi-24 kungalane yamazwe abekwe kuBand Four njalo abeliqembu lakuqala ukufakwa kuPool F.
Ukuze afinyelele kuWorld Cup, ama-Sables abazintshantshu ze2025 Rugby Africa Cup enqoba iNamibia 30-28, kumdlalo owawusedolobheni leKampala, Uganda ngoNtulikazi.
Amalanga emidlalo enkezo ka2027 awakakhitshwa.
Umqhudelwano lo uzabe umkhulu nxa uqathaniswa leminye eyedlulayo ngoba kuzadlala amazwe angu-24, ebanga inkezo yeWebb Ellis. Kumincintiswano edluleyo, bekudlala amazwe angu-20.
Utshintsho lolu luzadala ukuthi kuvulwe isigaba seRound of 16. Amazwe abekwe kumaqoqo ayisithupha, linye ngalinye lilamaqembu amane. Amabili azaphumelela evela kumaqoqo, azaqhubeka esiya kusigaba ezilandelayo eseRound of 16 kusiyaphambili.
Uluhlu lwamaqembu aku2027 Rugby World Cup:
Pool A: New Zealand, Australia, Chile, Hong Kong
Pool B: South Africa, Italy, Georgia, Romania
Pool C: Argentina, Fiji, Spain, Canada
Pool D: Ireland, Scotland, Uruguay, Portugal
Pool E: France, Japan, USA, Samoa,
Pool F: England, Wales, Tonga, Zimbabwe
