Online Reporter
Brandon Moyo
ABADLALI be-golf abasakhulayo abakuleli uMiriam Masiya loMunesu Chimhini, bathole imendulo zegolide kumncintiswano weFourth African Youth Games ezweni le-Angola.
UMasiya loChimhini banqobe abanye abadlali abakade bekhangelele igolide uSam Nel oweNamibia loBelinda Wanjiru oweKenya.
Kuhlandla labafana, uChimhimi uvule umdlalo nge- levela par 72, eke yabanjwa nguDestiny Oyero oweNigeria kunye loNel. Ulandele lapho wathola 74 kuhlandla lesibili.
Uthe esephenduka ukuzoqedisa umdlalo wakhe, uChimhini uthole three-under-par 69, waqedisa nge one-under-par 215. Le ibingeminye yemiklomelo emihle kulumncintiswano.
Kuhlandla lamantombazana, uMasiya ukhokhele kwaze kwayovalwa umdlalo. Uvule nge one-under-par 71, qede lapho wabeka one-under-par 72.
Uqede ngenye njalo i71, two-under-par 214. Kube nguye yedwa untombazana otshaye under-par, kuthi othole imendulo yesiliva, uWanjiru, ubeke 15-over-par 231.
Inhlanganiso yeZimbabwe Golf Association (ZGA) ibatshayele ihlombe abadlali.
“Kuyancomeka abakwenzileyo njalo kuyisitshengiselo sokuthi abadlali bethu babalelwa phakathi kwentshantshu kuzwekazi le-Africa,” kubika iZGA.
“Kusiyaphambili, silethemba lokuthi bazaqhubeka bephakamisa umdlalo wabo, labo baziphakamise kunye lokujabulisa ilizwe. Amhlophe, siyalibonga ngokuba ngaba mmeli belizwe.”
Abadlali bobabili bebeqeqetshwa nguSimon Murungweni.
