Online Reporter
Yini izimpambosi zesenzo?
Izimpambosi zesenzo ngamagama amatsha alengqono entsha, akhiwe ngokusebenzisa izijobelelo eziqwini zezenzo. Izijobelelo ezizalwa ngale indlela sizibiza ngokuthi yizimpambosi zesenzo.
Ziyisikhombisa impambosi zesenzo. 1. Ezokuyenzayenza 2 Eyokwenziwa 3 Eyokwenzana 4 Eyokukwenzisa 5 Eyokwenzela 6 Eyokwenzisisa 7 Eyokwenzeka. Usungakhetha ukuthi uzifunda ngayiphi indlela lezi impambosi.
Impambosi yokwenzayenza. Impambosi le siyakha ngokuphindaphinda isiqu sesenzo. Liyazichaza igama lale impambosi. Litsho ukwenza into ngokungayi ngaphi njengokuthi: Dlayidla uhambe. Thintithintitha uthuli emdulini.
Ngimbone ebhodabhoda ndawonye. Uthe musa ukuhlekahleka lapha.
Kwesinye isikhathi singayisebenzisa impambosi le nxa siveza ukuthi ulutho oluthize lwenziwa kalula kungelabunzima. Izibonelo: Ngithe ngifika ngekhaya ngawatshawatsha ngaqeda ngesikhatshana. Isamu leziyana ngizibhalabhale ngaziqeda masinyane abanye bengakafiki. UZodwa ufike waphenduphendula yonke imibuzo watshiya umbalisi emangele.
Silakho futhi ukuyisebenzisa impambosi le ekulanduleni nxa siveza ukuthi ulutho oluthize kalwenzeki lulu. Izibonelo: Inkuni kazibonwabonwa kulesi sigaba selizwe. Ingane le kayikhalakhali ngaphandle kokuba ilambile. Indoda le ikhanya ilolaka, kayihlekahleki.
Kuviki ezayo siza khangela ukwakhiwa kwempambosi yokwenzayenza.
