Online Reporter
Ethel Ncube
ABALIMI sebekhuthazwe ukuthi babhalise kuZimbabwe Revenue Authority (Zimra) ukuze bathole ama-tax clearance certificate ukuze nxa sebethengisa izilimo zabo kubelula.
UMnumzana Gideon Nleya obemele i-Zimra kumhlangano wenkundla yabalimi oqhutshwe eZimbabwe International Exhibition Centre kuviki ephelileyo ubike ukuba abalimi kumele babhalise kuZimra ukuze bathole izithupha zomthelo.
Ekhuluma emhlanganweni lo, uMnu Nleya uthe ukubhalisa lokhu kulula.
“IZimra yinkampani kaHulumende encedisa ukuthatha imthelo ebantwini. Singabalimi sonke sikubhizimusi, kungakhathalekile ukuthi ibhizimusi lakho linganani kulemilandu okumele uyilandele.
“Kungumlandu wakho ukuba nxa suqale ibhizimusi kumele ubhalise kuZimra njalo uba lomlandu wokuba ubhadale umthelo kuHulumende. Ukuze ubhalise akudingakali mali,” kutsho uMnu Nleya.
Uthe okuqakathekileyo nje yikubona ukuba labo abakuncedisa ukuthi ubhalise kuZimra basemthethweni.
“Abanye benu livame ukuthi nxa lisenzisa ama-tax clearance certificate lihambe kuma-Agents nxa usenza le-Agent buza isithupha sakhe seZimra, ube lobufakazi bokuthi uyi-Agent ngoba abanye bathatha amathuba badlele abantu imali zabo bethi bayabalungisela kanti baqamba amanga.
“Nxa ubhekana lenhlupho ekubhaliseni lokhu qonda eMhlahlandela kuground floor bayekuncedisa mahala kungelambadalo. Okwakho yikuthi inombolo zakho zesithupha ubelazo kanye le email address.
Nxa usubhalisile, imali oyibhadalayo kuZimra yi-20% yenzuzo yakho kuphela mlimi.
“Ngaleso sizatho ngiyalikhuthaza balimi ukuba libe lama tax certificate ukuze nxa selithengisa isivuno senu lingabi lohlupho,” kuphatha uMnu Nleya.
