Londile Moyo
YiNtatheli kaMthunywa
ABAFUNDI ababhala imihloliso ye-Ordinary Level (O-Level) le-Advanced Level (A-Level) ngaphansi kweZimbabwe School Examinations Council (Zimsec) sebezavunyelwa ukubhala izifundo ezingedluli isitshiya galolunye ku-O-Level lezintathu ku-A-Level.
Lesi isinqumo esithethwe nguHulumende, sihlose ukuthuthukisa ukufunda okujulileyo.
UHulumende uxwayise izikolo ukuthi zingamukeli imali yokubhala izifundo ezedlula inani elibekiweyo. Abafundi asebebhadele imali yezifundo ezengeziweyo bazabuyiselwa imali yabo.
Lesi sinqumo siyingxenye yemizamo yokuhambisana leHeritage-Based Curriculum lokuqeda umkhuba wokuthi abafundi babhale izifundo ezinengi kakhulu.
Ukubhalisa imihloliso yalonyaka kuzavalwa mhlaka 27 Mbimbitho.
Ekhuluma lentatheli umqondisi wezokuxhumana kugatsha lwePrimary leSecondary Education, uMnumzana Taungana Ndoro, uthe umthetho lo usuqalile ukusebenza.
“Kasisoze samukele imali evela kulabo abafuna ukubhala izifundo ezingaphezu kwalokho okuvunyelweyo. Labo asebebhadale bazabuyiselwa imali yabo.”
UHulumende uthe isinqumo lesi sizanceda abafundi ukuthi bagxile ezifundweni ezimbalwa ukuze bazwisise ngcono, balungiselele kuhle njalo bathole impumela engcono.
Eminyakeni edluleyo kube lokwanda kwabafundi ababhalise izifundo ezinengi kakhulu, okudalwe yikuncintisana okukhulu, ukuzama ukuthola amathuba amanengi okungena emanyuvesithi lokucabanga ukuthi ukubhala izifundo ezinengi kwenza umuntu aphumelele kakhulu.
Ngo2025 uMukudzei Ziveyi owePamushana High School, eMasvingo wabhala izifundo ezilitshumi lambili wathola imiklomelo engu-56. Lanxa abanye bemtshayela ihlombe, abanye bathi lokhu kubeka unthwalo ongadingekiyo kwabanye abafundi.
Umgcinisihlalo wekhomithi lePhalamende elibona ngezemfundo yePrimary leSecondary, uSupa Mandiwanzira, uthe ukuqiniswa komthetho lo kusekelwe kulokho osekuhlolisiswe kwabonakala kufanele.
“Sikhangela okusebenzayo, njalo lokhu okutshiwoyo nguHulumende kuyazwakala.”
Online Reporter