admin
Johas Moyo
ZITHITHIBELE izisebenzi zemgodini weGwizo eZhombe kulandela ukutshaywa kwezinye zazo ezine ngamagetsi ngesikhathi ziphansi emgodini kuviki ephelileyo.
Kubikwa izisebenzi lezi ezatshaywa ngamagetsi zalimala zilokhu zilalisiwe esibhedlela seKwekwe.
UMthunywa uzwe ukuba okwenza izisebenzi lezi zihlale ziphethe izibindi ngezandla njalo zesabe lokusebenzela emgodini lo yikuthi kumaviki amabili adluleyo kulesinye njalo isisebenzi esatshaywa ngamagesti safa phakathi emgodini lo.
Esinye isisebenzi esikhulume loMthunywa esingathandanga ukuqanjwa ngebizo siveze ukuthi sekulezehlakalo ezimbalwa lapho okutshaywe abanye babo ngamagetsi ngakho sebesesaba ukungena emgodini.
“Sekuyingozi sibili ukungena emgodini lo ngoba akulaviki edlulayo kungelamuntu otshaywe ngamagesti.
“Sesisebenzela evalweni kodwa okusizwisa ubuhlungu yikuthi abaqhatshi bethu kabalandaba lokuthi kulungiswe bona bafuna imali nje kuphela,” kutsho isisebenzi lesi.
UMthunywa uxhumane loThomas Mthimkhulu ongumaqhuzu kulowomgodi oveze ukuthi kuliqiniso ukuthi abantu sebebanengi abatshaywa ngamagetsi njalo akukabi lamanyathelo asenziwe ukuthi kucazululwe uhlupho lolu.
“Mina ngabikela abakhulu ngohlupho esilalo ngomgodi lo. Umgodi lo usemthethweni njalo abanikazi bawo ngamaChina abalokhe bebalisela ukuthi bazawulungisa ngoba kukhanya amagetsi kasamanga kuhle phansi njalo sokulamanzi ayiwo enza impilo zabantu zibesengozini.
“Sikhangelele ukuthi uhlupho lolu luzakhangelwa kungakabi lomonakalo omkhulu njalo ngoba lezisebenzi sezisesaba ukusebenza ikanti banengi abaphila ngokwemba igolide kuyonale indawo,” kutsho uMnu Mthimkhulu.
UMthunywa kenelisanga ukuxhumana lamaChina ayiwo angabanikazi bomgodi ngoba ucingo belungangeni.
Online Reporter