admin
KULENINA elihlala eThaba Nchu eFree State kwele South Africa okubikwa lithi umakhwapheni womkalo walithakatha ngenhloso yokuthi lihlale lihlupheka okwempilo yalo yonke nanko phela umkalo uthi liphenduka inyoka nxa belele ebusuku.
Lelinina nguNkosikazi Thakane Matang (39) othethwe nguMnumzana John Matang kusukela ngomnyaka ka 2003 okubikwa uthi umkakhe lo usemphatha ngochuku ngenxa kamakhwapheni wakhe lo oselaye yikho esesithi uyathakatha. Kubikwa uMnu Matang uhlala etshiya umkakhe lo yedwa ahambe ayezikholisela labomakhwapheni.
Okunye njalo kubikwa indoda le seyamthathela abantwana bonke kanye lezithupha zakhe lezabantwana zokuzalwa lempahla zonke ezisendlini.
UNkkz Matang ubike ukuthi umkakhe waqala ukugila imikhuba le ngemva kokubuya lomakhwapheni wakhe endlini walala laye embhedeni umkakhe elele phansi.
“Umkami wayelungile kakhulu ngakho waqala ukugila imikhuba yakhe ngethuba esethandana lentombazana abuya layo endlini yami.
“Ngemva kwalokho waqala ukuthi kulondofa endlini njalo mina nxa ngilele laye ngiyaphenduka ngibe yinyoka wathi ngingasalali laye.
“Ngazama wonke macebo okuthi ngitshiye umendo wami kodwa kuyehlula ngakho ngibona angani umakhwapheni wakhe lo owabuya laye endlini nguye owahle wathakatha ukuthi singasazwisisani lomkami.
Isimanga yikuthi nsukuzonke nxa efika uqala abuze kubomakhelwane ukuthi ngiyaphila yini,” kuphetha uNkkz Matang. — Ubulembu
Online Reporter