Online Reporter
Ethel Ncube
NGALESISIKHATHI sokutshisa abalimi bakhuthazwa ukuba banakekele inkukhu zabo njalo babone ukuba bayazipha amanzi amanengi.
Inkampani yeProfeeds ngesikhathi ifundisa abalimi ngezitshengiselo ze-heat stress ebulenjini iveze ukuba ukutshisa kwelanga kuyabulala inkukhu.
UNkosazana Brenda Kandiero obona ngezokufuywa kwenkukhu ubike ukuba abalimi abahlale bekhangela inkukhu zabo njalo baziphe amanzi eneleyo.
“Balimi khathesi kuyatshisa njalo inani lokufa kwenkukhu liyaqansa ngoba zibulawa ngumumo womkhathi wokutshisa.
“Inkukhu esezihlaselwe yi-heat stress ziyabe ziphefumulela phezulu lokhu lakho kuyatshengisa ukuba ziyatshiselwa, kuyabe kumele ubone ukuthi esilugwini lapho ezikhona kuyangena umoya oqandelelayo,” kutsho uNkszn Kandiero.
“Okunye ubona inkukhu nxa ufika kizo esilugwini uzithole zivule amaphiko zizama ukuba zidinge umoya oqandelelayo.
“Nxa sezinjalo, lokudla ziyabe zingasadli kuhle okucina kudala ukuba ziwe esikalini.
“Okunye nxa zitshiselwa uthola zisehluleka ukugijima ikakhulu amatsiyane, amatsiyane kumele agijime agcwale indawo yonke kodwa uwathola engasagijimi ngenxa yokutshiselwa,” kutsho uNkszn Kandiero.
Uqhubekele phambili ekhuthaza abalimi ukuthi bakhangele izitshengiselo lezi ukuze benqabele ukufa kwenkukhu zabo.
“Nxa ufuna inkukhu ezinengi kumbe zingaki kumele ubone ukuba isilugu sakho siyangena umoya oqandelelayo, inkukhu zingatshiselwa.
“Okunye inkukhu ngesikhathi lesi sokutshisa zifuna amanzi amanengi njalo kumele kube ngamanzi ahlanzekileyo. Nxa kutshisa ulakho ukuthi ufake amanzi aphuma kumaqandisa mbijana ukuze wehlise ukutshisa kwamanzi akho.
“Amanzi kumele ahlale ekhona angasileli ngoba ayavikela ukuba inkukhu zakho zingabi le-heat stress,” kuphetha uNkszn uKandiero.
