Online Reporter
Raymond Jaravaza
KUBHIDLIKE izakhiwo ezihlala izibotshwa eKhami Prison Complex kulandela ukuna kwezulu lesiphepho ngoMvulo emini.
IKhami Prison Complex, ebude buduzane ledolobho lakoBulawayo igoqela amajele athi, iMaximum Prison, Medium Prison, Remand Prison leMlondozi egcina abesifazane lalabo abangaphilanga kuhle engqondweni.
Izulu eline ngoMvulo libhidlize uphahla lwezakhiwo ezimbalwa, lawisa ucingo lothango olungaba yi-160 metres.
Akulamuntu olimeleyo. Izibotshwa ebezilapho okubhidlike khona, zibekwe kwezinye izakhiwo.
Umsekeli kakhomanda weZimbabwe Prisons and Correctional Service (ZPCS) koBulawayo u-Assistant Commissioner Priscilla Mthembu lezisebenzi zeCivil Protection Unit (CPU) leJoint Operations Committee (JOC) bafikile ukuyahlolisisa ngomonakalo.
