admin
BAKHANYA bemangele. Imilomo inkemile. Sebejiyelwe kabasazi lokuthi bathini. Lokhu sikutsho ngoba izulu lisuke lana ngesikhathi lingalindelwe. Phakathi kweviki sasizigqokele iyembe nje zwi siginqe tshitshi. Sasingakulindele okweza ngempelaviki. Kweza umqando onqumisa umnkantsho. Kwaqanda amazinyo atshayana.
NguMpandula lo, isikhathi sokuthi izihlahla zinunkule amaluba aqhakaze amahlamvu ahlume. Yisikhathi sokuthi litshise likhuphe inhlanzi emanzini loba likhuphe umkhovu etsheni. Phela liyabe libasela ukuze imbiza ibile izulu litshaye phansi. Nanko-ke kusiza esasingakulindele.
Sezwa izangoma zezulu zisithi eKezi lana kakhulu ledlula koBulawayo. Ngithe ngisanda ukuzuza umbiko lowo ngezwa sebethi eSankonjana umfula uKafusi ubegcwele phamu egola intethe.
Yibo-ke laba abangasazi ukuthi bathini sebeze bejiyelwe. Izulu elingaka lande ukuna ngenyanga kaMfumfu kusiya phambili. Lapho-ke inhlanyelo zazibe sezilungile lezitorobho lamajogwe sekulungile. Abantu babahle baphume bayelima, bafake phansi inhlanyelo. Abanye bakhuza inkabi kuthi abanye batshaye lokhu okuthiwa ngu-gatshopo beqabanga inhlanyelo.
Lapho bayabe besazi ukuthi izulu elinengi lizaze lifike inhlanyelo esimilile ilokhu isaphila. Phela kwande ukuthi izulu elinengi lize ngoLwezi. Pho lo nguMpandula nxa abantu bengaphuma lenhlanyelo bayifake phansi kungenzeka kutshe izulu lilokhu lingakafiki. Kodwa phela nxa umdaka usukhona abanye bangathanda ukuthi baphendule. Lapha kuzakuthi nxa selikhona kokuphela abantu bangabe besalima futhi kodwa bamane bahlanyele. Nxa kulinyiwe lamanzi ezulu kagelezi kangako. Angena phansi ngoba ebanjwa ngumhlabathi olinyiweyo.
Kodwa lanxa abantu bengakwenzanga lokhu izulu leli eliphangisileyo liza losizo kuMahlabezulu. Kukhangelelwe ukuthi izihlahla ziphangise ukununkula. Phela ezindaweni eziseMatabeleland South bekuvele sekulugwadule. Utshani besebaphela ezindaweni ezinengi. Besekwandile ukubona izimota zithwele utshani zibuhambisa emizini yabantu lemapulazini abo ukuze kusizwe izinkomo zabo.
Abanye njalo bebehambisa ukudla kwenkomo okuhlanganisiweyo ukuze izinkomo ziyemofuza zibambe imiphefumulo. Kanti lamanzi abesetshile emifuni. Lamachibi amanengi abesecitshile. Pho njengoba limifula ibisigola intethe kutsho ukuthi amanzi angenile kwamanye amachibi. Leziziba sezivuselelwe. Konke lokhu kuzasiza imihlambi yethu. Siyalibonga leli izulu lesihlambo elize singalilindele.
Okomqando akunani sesigodole kwedlula kodwa phela silitholile izulu. Amajazi lawana ebesesiwafake emawodrobhini abesephumile. Lembawula zabaselwa abantu botha eyamakhanka. Abanye bathe line ngoba phela iviki le edluleyo bekukhunjulwa inkosi yoHlanga uMzilikazi kaMatshobana. Abethe gwaqa aMahlabezulu eMhlahlandlela lapho okwakungumuzi wenkosi isawadla amabele. Siyazi ukuthi bakhona ababekhumbule ukuthi yikho okulele khona inkosi yoHlanga. Hatshi inkosi ilele eNtumbane.
Phela izolo kwakuthi nxa kuthethelwa sihle sibone ngamazolo. Siyasihle sazi ukuthi abaphansi basamukele isicelo sethu. Lomkhuleko wethu uyabe wamukelwe. Lukholo lwabanye lolu. Engxenye lokhu kusitshengisa ukuthi elizayo linengi. Engxenye lo ngumnyaka wezulu. Akwazi bani phela nanko lezanuse zezulu sezisenga lezimithiyo. Sezimane ziwumane nje zehluleke ukubona loba zibone okungekho nje.
Abanye labo bathi bekulomkhuba obusenziwa khona eNjelele. Pho angithi leyo ivele iyindawo yamazolo. Futhi siyazi ukuthi izinyawo zalabo abayabe beyecela khona amazolo zazicitshwa lizulu. Bayatsho abaziyo ke ukuthi engxenye lokhu yikho okwenze izulu lana. Thina okwethu yikuthi sithi thina kasazi ngoba sivele kasazi.
Online Reporter