admin
Kabafuni ngilotsholwe
OKOKUQALA Khulu ngithemba uqine saka. Ngiyintombazana eleminyaka yokuzalwa engu-20 ngihlala labazali bami njalo ngesikhathi ngisesikolo ngaba lomntwana. Ngize ngizithwale abazali bami bala ukuthi ngiye kumkami bathi ngiqale ngiqede isikolo. Bathi ngingaqeda isikolo umkhwenyana ukhululekile ukuthi azolobola. Uyise womntanami uyasebenza kodwa mina ngifunde ngacina kusibanga esiphezulu kulesakhe. Kungakho sebefuna ukuzolobola njengoba sengaqeda isikolo. Abazali bami kabasafuni ukuthi angithathe ngoba bathi bafuna ngithathwe ngumuntu ofunde njengami. Khulu nginceda ngehlukane yini loyise womntanami ngoba engafundanga? Ngenzeni Khulu? Ukufunda kuqakathekile yini thina sithandana, njalo umntwana lo esilaye ke? Ngincedisa Khulu.
Impendulo
Uhlupho obhekane lalo mzukulu luhlangana lamantombazana amanengi alabazali abanjengabakho. Abantu bakholwa ukuthi umuntu angafunda kakhulu uba lemali enengi kumbe njalo ucina esiba phezulu kulabanye bonke. Lokhu akusiqiniso. Kumele uhloniphe umyeni wakho ngoba ukufunda akulani lomtshado wenu. Okukhulu luthando phakathi kwenu lobabili. Ukuthathana kufuna umuntu ahlakaniphe ngoba lesi yisifungo esikhulu kulazo zonke — sofa silahlane — ngesempilo yakho yonke. Ungalandeli abazali bakho ngoba bona sebelomuzi wabo. Khumbula njalo ukuthi umntwana uzamuthini angakhula. Kuqakathekile njalo ukuthi abantwana bakhule bendawonye labazali babo. Kulabo abazadla amabala esikolo ngithi kini qaphelani. Khangelani lo owazithwala esesikolo. Tshiyanani lokudlala imidlalo yabantu abadala liqale liqede isikolo lilotsholwe.
Ngihamba labantwana yini ngisiyakwenda?
KHULU ngicela ukubuza ukuthi nxa ngisiyakwenda kodwa ngilabami abantwana ngihle ngihambe labo yini kumbe njalo bayasala ngakithi balandele ngemva kwesikhatshana?
Impendulo
Lokhu kuyisivumelwano phakathi kwakho lendoda efuna ukukuthatha. Njengomthetho othi isihlahla sibuthwa lengatsha kanye lamahlamvu aso lapha kusebenza isivumelwano senu lobabili. Kuyenzakala ukuthi wena uhlala labantwabakho ngaleyondlela nxa ususuka emzini omdala uhamba labo. Akusoze kwenze ukuthi uthi kabaye kugogo wabo ngoba sekufike isilo lapha ekhaya, kodwa nxa abantwana laba bebehlala kwenye indawo liyalungisa usuku lokuyabathatha ngoba wena umele uqale uyebona lapho oyahlala khona ukuthi uyamukeleka yini. Indaba yokuthathwa kwabantwana emendweni enjengale okhuluma ngayo iya ngesivumelwano senu.
Usangithanda yini lubaba Khulu?
KHULU linjani? Ngilohlupho. Ngingumama oleminyaka engu-33. Ngendile kubaba ole-62. Ubaba lo wangithatha esehlukene lonkosikazi wakhe bevele omunye ehlala kwelinye idolobho omunye ekwelinye. Uhlupho nantu Khulu, ubaba usebuyisene lalo umama futhi njalo uselomakhwapheni ahlanyisana laye. Lumakhwapheni ulokuthumela ama SMS kumkami ukuba aqaphele ukutshiswa ngamanzi lokunye okunengi. Ngingagada laye ibhasi uyathumela indoda yami iSMS kuthiwe ngilaye. Ngenzeni Khulu?
Impendulo
Into yokuqala engithanda ukuthi ngiyazi yile, indoda le iyakunanza ngothando langakho konke njengasekuqaleni kwenu yini? Kuzo zonke iziphithiphithi lenhlupho ozibonayo lozizwayo zivela kuyo indoda yakho na? Zwana, umakhwapheni lowo mthathe njengothuli lwamadube ebalekela isilwane esibhongayo sona sizaphinda sithule singenzi lutho. Into eliqiniso ngomyeni wakho akakhuli uthanda ukuba yiliqhwa kokuphela, kulesisikhathi sakhathesi umuntu onjengaye uyamangalelwa kwabahloniphekayo abayizihlobo ngoba sekulemikhuhlane eminengi ethelelwana emacansini. Bona laba bazamcebisa ngengozi esikhona kwabangaziphathiyo. Qinisa ukuthula kodwa umtshele ukuthi masinyazana nje njengomzingeli uzathi ejikijela esixukwini kanti silomvundla. Maye babo angaze akuthwalele igazi lomvundla wasezixukwini ubusufela amafufu ngenxa yalokhu ngithi phangisa ubikele abadala lehlukane. Angilayo inkuthazo yokwehlukanisa abantu ngiba lesimemezelo sayo nxa indoda isidinga indlela yokubulala umkayo ngamacansi. Angiloyisi mzukulu ukuthi ufe usufike kimi. Nxa ezithanda izidwaba zakhe lezo kathathe isithembo saziwe ngabantu bonke.
Online Reporter