admin
. . . ‘Kuyatshisa phezulu kwelogu’
Nkosilathi Sibanda
UMQEQETSHI weChicken Inn uJoey Antipas uyakufihla ukuthi akatshaywa luvalo ngokudlala engela sivutha somdlali wakhe uDanny ‘Deco’ Phiri ngoba iqembu lakhe lilabo abadlali abangenza umsebenzi ofanayo. Iphephandaba likazulu lihlasele uAntipas ngembuzo yokuthi uzayikhetha njani ithimu mhla edibana leZPC Kariba kumdlalo weligi yeCastle Lager ngoMgqibelo eLuveve.
Lokhu kuza ngemva kokuthi ngaphandle kukaPhiri, abanye abadlali bamaGamecocks abangasoke babekhona ngumgadli othenjiweyo uRaphael Kutinyu lodlala esiswini uLawrencwe Mhlanga. Bobabili laba bakuqembu lama-Under 23 ancintisa kumqhugelwano wama-All Africa Games.
Umbiko ophuma emawofisini enhlanganiso yePremier Soccer League uthi uPhiri, ongukaputeni weChicken Inn umiswe ukudlala kulumdlalo ngoba sewathola amakhasi alithanga amathathu kubonompembe.
UPhiri ubebalulekile kulumdlalo ngoba usanda kuvela kumkhankaso wamaWarriors weAfrica Cup of Nations ka2017 lapho ancedise ukuhlohlwa kwebhola elitshiye iZimbabwe ingutshiki lobhanqa lesizwe seGuinea.
UAntipas utshele uMthunywa ukuthi akethuki lutho ngokuswelakala kwabadlali laba abathenjiweyo.
“Abadlali okukhulunywa ngabo bayinsika kuqembu kodwa asinanzelele ukuthi iChicken Inn idlalelwa ngabadlali abanengi.
Sekulamaviki iqembu leChicken Inn lindiza phezulu kwengalane yeligi yeCastle okuyikho okwenza umqeqetshi walo uJoey Antipas abike ukuba ujabule kakhulu.
Kumidlalo emibili edluleyo, iChicken Inn yenelise ukubambelela phezulu kwengalane ngokuthola imiklomelo eyisithupha. Inqobe iHwange 2-0, yaphindisela njalo kumakhelwane wayo iHighlanders 3-2.
Kuliviki, iligi ingena kumdlalo wamatshumi amabili lambili, iChicken Inn ikhokhela ngemiklomelo emine kuphela.
Ukudibana leZPC Kariba kuzakuba ngumthwalo ngenxa yokuthi izethekeli ziwomele ukuthola imiklomelo engazisiza ukuthi zibalekele ukuxotshwa kuligi yeCastle Lager. IChicken Inn yona kumele igcine isikhundla sayo phezulu ngokuvula udwendwe.
“Engingakutsho yikuthi umdlalo lo ngiyawuqakathekisa. Isigaba seligi esikuso sinzima. Ungaze ubuze wuphi umqeqetshi weligi uzakutshela ukuthi ukuhlala phezulu kufuna ukuqina okwedlulisileyo,” kutsho uAntipas, umqeqetshi owake wathatha inkezo yePSL ekuMotor Action ngo-2010.
Uthe njengoba iChicken Inn ingakaze ihluthune inkezo ezwayo lokhe yangena kuligi ephakemeyo, yena uzakutshintsha lokhu.
“Sengibonile ukuthi ngingenelisa ukuyikhuza iChicken Inn ukuze layo ithole izicoco ezizwayo.”
Omunye wabadlali bakaAntipas okade ebizwe kuqembu lamaWarriors uEdmore Chirambadare uthe kuzatsheka ibhetshu ngoba bazizwa belomfutho wokuthabisa umqeqetshi.
“Kumele sinqobe ukuze ivule isikhala kulogu. Nxa umqeqetshi esikhuza, sizenza njengokutshelwa kwethu ukuze silibone igedi sihlohle.”
Online Reporter