Izulu lokulima alikani

Ethel Ncube

INHLANGANISO ebona ngezokulima eye-Agritex isiveze ukuba isilinganiso sezulu lokuthi abantu baqalise ukulima asikafiki kungakho kubalulekile ukuthi abantu balinde ukuze bathole isivuno esihle.
UNkosazana Nomasonto Ndlovu ongu-Agritex Officer ubike ukuba izulu lokuthi abantu baqalise ukulima alikani kungakho abalimi kabalinde izulu elizwayo.

Ekhuluma lentatheli uNkszn Ndlovu uveze ukuba abalimi abalinde mbijana izulu lokulima lifike.
“Abantu sebephaphatheka beqalisa ukulima kodwa izulu lokuthi balime alikani. Sikhangelele ukuba abalimi balime nxa izulu lingana ledlule isilinganiso se- 20mm.

“Lesi yiso isilinganiso esikhangelelweyo ukuthi abantu baqalise ukungena emasimini belime. Abakagatshompo labo sebengaqala ukuba bahlanyele. Nxa izulu lingakafikisi i-20mm asimeni ukulima ngoba kulakho ukuthi inhlanyelo ingamili ngendlela eqondileyo,” kutsho uNkszn Ndlovu.

Uqhubekele phambili eveza ukuba izulu elingana endaweni ezitsheyeneyo, abantu bangalimi.
“Nxa kulinywa kumele izulu line okuzwayo phansi kubemanzi ikanti futhi izulu selingana kubemanzi lapho ohlala khona ucabange ukuthi sekulungele ukuthi ulime kanti linile kodwa alifikanga ku-20mm.

“Kuqakathekile ukuba abalimi bahlale bexhumana labalimisi abaseduzane labo babancedise ukuze bakwazi ukuba sesifikile isikhathi sokulima. Kungakho sikhuthaza abalimi ukuba bamelele izulu line lifikise isilinganiso esingaba yi-20mm,” kutsho uNkszn Ndlovu.

Balimi, siyalicebisa ukuze lingalahlekelwa yinhlanyelo mahala ingasamilanga kuhle kumbe kumilile kwatsha asilindeni izulu line lifike kusilinganiso esikhangelelweyo,” kuphetha uNkszn Ndlovu.