admin
Ethel Ncube
KULOMFUNDI oleminyaka engu-16 weGwelutshena eNkayi ogwaze omunye (15) ngengqamu wafa bevela esikolo kubangwa ijaha, uMthunywa ukuzwile lokhu.
Umuyi kunye lometheswacala esingeke sachaza igama lakhe, kubikwa bebefunda esikolo seThokozani Secondary esiqintini seMawala, eNgwaladi khonale eGwelutshena njalo baxabana ngoLwesine kuviki ephelileyo.
UMthunywa uzwe ukuba ngalelolanga ekuseni, umetheswacala walanda umamangala wambuza ukuthi kungani ethandana lejaha lakhe okwenza bacina bengasazwisisani enkulumeni.
Kuvele ukuba umetheswacala walandisela umzawakhe ngendaba le owamnika ingqamu ayisebenzisa ukugwaza lo omunye.
Kubikwa ngehola lesine emine sebephuma esikolo, umetheswacala walandela umamangala endleleni wafika wambuza njalo ngendaba le bacina sebesilwa.
Umetheswacala ngokucwayiza kwelihlo wakhipha ingqamu ayeyifake eqolo ngaphansi kwe-unifomu wamgwaza emakhaleni kunye lesandleni. Kubikwa loba umamangala wazama ukubaleka kodwa umetheswacala wamhlala izithende wamfica waphinda wamgwaza futhi isandla kunye lebele okwenza wawa wafela lapho.
Indaba le yabikelwa amapholisa, isidumbu sasiwa esibhedlela seUnited Bulawayo Hospitals ukuze siyohlolwa.
Isikhulumi samapholisa elizweni uAssistant Commissioner Paul Nyathi uvumile ukuthi indaba le yenzakele.
“Amapholisa eGwelutshena achwayisisa isehlakalo lapho umfundi oleminyaka engu-15 ofe kubangwa ijaha lomunye umfundi oleminyaka engu-16, wesiqintini seMawala eNgwaladi.
“Umetheswacala wagwaza umamangala ngengqamu ayinikwa ngumzawakhe oleminyaka engu-14,” kutsho uAsst Comm Nyathi.
Online Reporter