admin
Cornelius Luphahla
IKHANSILI yakoBulawayo ikhuthaza izakhamizi ukuba zehlise inani lezinja elizifuyileyo ngemva kokuba iqale umkhankaso wokuzithatha lezizinja lokudubula ezingelabanikazi ngenhloso yokwehlisa umkhuhlane wobhova osuhlasela abantu abalunywa yizinja kulelidolobho.
Umkhankaso wokwehliswa kwenani lezinja kubikwa uzaqala mhlaka 6 Nhlangula uze uyekuma mhlaka 30 Mpandula lonyaka lapho iKhansili yakoBulawayo ezancedisana khona lenhlanganiso yezinyamazana iVeterinary Field Service, Zimbabwe Republic Police kanye leSociety for Prevention of Cruelity to Animals, ukwehlisa inani lezinja kulelidolobho ngendlela ezehlukeneyo.
Kubikwa kusukela mhlaka 6 Nhlangula iKhansili yakoBulawayo kanye lenhlanganiso ezibethwe phezulu izabe ibhoda idolobho lonke ihlola izinja ezingavalelwanga lezihlala ezindlini ezingabiyelwanga ngemiduli kumbe ucingo izidubula ibuye iqinise njalo umthetho wokuvalelwa kwezinja kulelidolobho.
Ekhuluma lentatheli uKhansila welokitshini leCowdray Park uMnumzana Collette Ndlovu uchaze ukuthi kuyinto enhle ukuba izinja ziphungulwe kulelidolobho ngoba sezizinengi kakhulu.
“Kuhle sibili ukuthi izinja ziphungulwe koBulawayo ngoba sezizinengi kakhulu njalo abantu abazifuyileyo bayazincitsha ukudla bazixotshele phandle kuthi nxa sokusebusuku bazivulele ngoba besazi ukuthi yikho okuhamba khona amasela.
Okunye njalo ngabe kuyadutshulwa kanye labomangoye ngoba labo sebebanengi kakhulu lapha,” kutsho uMnu Ndlovu.
UMthunywa uxhumane loPublic Relations Officer weKhansili yakoBulawayo uNkosikazi Nesisa Mpofu ochaze ukuthi babone kungcono ukuthi kwehliswe inani lezinja koBulawayo ngoba ezinengi zazo zilobhova.
“Njengekhansili kanye lezinye inhlanganiso ezehlukeneyo ezibumba uBulawayo sibone kungcono ukuthi kwehliswe inani lezinja kulelidolobho ngoba sezizinengi kakhulu njalo ezinye sezilobhova zihlala egangeni ziluma abantu.
Lokhu yikho okudala ukuthi sithi umuntu kufanele engafuyi izinja ezedlula ezimbili endaweni encane kule 2000m2,” kuchaza uNkkz Mpofu.
UNkkz Mpofu uqhubekele phambili waveza ukuthi abafuye izinja kufanele bazihlabise babuye bazithathele i-licence.
“Wonke umuntu ofuye izinja kufanele ayihlabisele umkhuhlane wobhova abuye njalo ayithathele i-licence njalo ahlale ezivalele zingaphumeli ngaphandle kweguma,” kuphetha uNkkz Mpofu.
Online Reporter