admin
Cornelius Luphahla
BADLA amahabula abazali babafundi besikolo sesigabeni seChipale kulandela ukuzwa ukuba umphathisikolo wesikolo seChipale Primary uhuquluze inkulungwane zemali yesikolo osokudale ukuthi bale ukubhadalela abantwababo imali yesikolo bethi kasivalwe.
Abazali laba baqale ukudla ubhedu ngemva kokuba ama-auditors evakatshele esikolo seChipale Primary eveze ukuthi kulemali engabonakaliyo kulesisikolo engange$10 674 okucatshangelwa ukuthi umphathisikolo uMnumzana Albert Mpande nguye owayihuquluzayo.
UMthunywa uxhumane loMnumzana Austin Mwinde oyisakhamuzi sakule indawo wachaza ukuthi babona kungcono ukuthi bengabhadali imali yesikolo kuze kuvele ukuthi imali eyacatshayo yayangaphi.
“Njengabazali sibone kungcono ukuthi singabhadali imali yabantwabethu kulesisikolo kuze kuvalwe isikolo nxa umphathisikolo lo engasavezanga ukuthi imali le engabonakaliyo wayisa ngaphi.
“Akulasizo ukuthi sibe sikhipha imali idliwa ngumphathisikolo lemuli yakhe kulokuthi incedise ukwakha isikolo njengoba kukunengi okusilelayo kulesisikolo.
“Ngikhuluma nje khathesi balutshwana abantwana abasahamba esikolo ngoba nxa befika uyabayaxotsha ethi kababhadalanga esenzela ukudla njalo imali yethu,” kutsho uMnu Mwinde.
Esinye isakhamuzi sakule indawo esithande ukuvezwa ngokuthi nguNkosazana Ndlovu sichaze ukuthi umphathisikolo lo kadlanga yedwa imali le eyacatshayo njalo kufanele axotshwe.
“Ngokubona kwami umphathisikolo lo kayidlanga yedwa imali le, kungabe kukhona omunye umbalisi ayesidla laye.
Noma kunjalo njengoba ephiwe iviki ezimbili ukuthi achaze ukuthi imali le yayangaphi nxa kungavela ukuthi wayidla kumele axotshwe ngoba ngeke simvumele esibulalela isikolo sethu sikhangele,” kutsho uNkszn Ndlovu.
Ebuzwa ngale indaba umphathisikolo lo uMnumzana Albert Mpande uchaze ukuthi usayilungisisa indaba le.
“Kuliqiniso ukuthi kulemali engekhoyo kulesisikolo kodwa ngisayikhangelisisa ukuze kukhanye ukuthi yasebenza njani,” kutsho uMnu Mpande.
Ebuzwa ngale indaba uMqondisi wezeMfundo esabelweni seMatabeleland North uNkosikazi Boitathelo Mnguni uthe kuliqiniso ukuthi ama-auditors ahlola amabhuku emali kodwa uthe akuqaathekanga ukuveza ukuthi asebenza njani.
Online Reporter