Online Reporter
Innocent Kurira
UMGADLI weqembu lesizwe leYoung Africans eyeTanzania, uPrince “Mgadaffi” Dube, uhamba phambili ngokuhlohla amabhola kuleli, nanko usegaxe angu-11 entanjeni kuTanzania Premier League kulisizini.
Umdlali lo usethubeni lokuthola isicoco sokuhlohla amabhola amanengi kuligi ekupheleni kwesizini.
Uhlohle ngempelaviki lapho iqembu lakhe elihlohle amabhola amahlanu lidlala leMashujaa.
Uhlohle ngemzuzu engu-49, njalo uhlobo lwebhola alingenise phakathi lutshengise ukuthi uDube uyingcitshi enyaweni.
Omunye umdlali owenza kuhle eqenjini elifanayo nguClement Mzize osehlohle alitshumi. Odlalela iqembu leSimba SC, uJean Ahoua usehlohle ayisitshiya galolunye.
Kulandela uLionel Ateba oweSimba SC osehlohle ayisitshiya galombili loElvis Rupia oweSingida Big Stars FC olayisikhombisa.
Uhambo lukaDube esiya kuYoung Africans lwaqala ngoNtulikazi 2024 lapho ayelesivumelwano seminiyaka emibili.
Wayesuke kuqembu le-Azam lapho axabana khona lenkokheli zeqembu, kungasela kuzwisisana mayelana ngesivumelwano sakuqala, okwadala ukuthi isixazululo siphume kunhlanganiso yeTanzanian Football Federation.
Ekucineni, i-Azam yavuma ukuthi yehlukane loDube, yabhadala lesijeziso semali.
