Online Reporter
Innocent Kurira
UMQEQETSHI weqembu leMWOS uLloyd Mutasa kakufihli ukuthi iHighlanders liqembu elikhulu njalo uyalihlonipha.
UMutasa uveze lokhu ngesikhathi ebika ngamalungiselelo akhe omdlalo ozayo, wokuvula isizini phakathi kweqembu lakhe leHighlanders ngeSonto, eBaobab Stadium.
Kubadlali bakaMutasa, umdlalo lo uqakatheke kakhulu ngoba baqalisa ukudlala kuzinga eliphezulu njalo lumqeqetshi uwubona njengesivivinyo esikhulu sokulungiselela isizini entsha.
“Sidlala lelinye lamaqembu amakhulu kuleli. Imidlalo efana lale iqakathekile ukuthi sihlole ukuthi simi ngaphi ngokulungela kwethu isizini entsha. Kawukho umhloliso owedlula ukuhlangana lamaqembu afana leHighlanders, Dynamos leCAPS United.
“Kuyisivivinyo esikhulu, kodwa imidlalo enjengale iyasikhuthaza. Wonke umdlali ufuna ukudlala lethimu enkulu njengeHighlanders kodwa kumele silungiselele ngoba akusoze kubelula.
“Iqembu leHighlanders liqembu elikhulu elilomqeqetshi oyingcitshi, ngakho ukuqakatheka komdlalo lo angeke sikwehlise. Lithuba lokuthi sitshengise ukuthi silapha ukuze sincintisane, sitshengise amathalenta ethu. Leli lithuba lokuthi sitshengise njalo uzulu ukuthi siliqembu elinjani,” kutsho uMutasa.
Iqembu leli selithenge unozinti uMartin Mapisa, owake wadlala eSpain lakuDynamos. Abanye abadlali abakhona ngu-Innocent Zambezi owayekuCAPS United loClaude “Pokello” Mapoka kuNgezi Platinum.
Iphinde njalo yahluthunela iSimba Bhora uGift Saunyama umgadli loBilly Vheremu, yavumelana loMatthew Murambiwa owayekuHarare City.
UMutasa, owayebambe intambo kuFC Platinum, Dynamos lakuGreenFuel, usanda kuvela eTurkey kuzifundo zokuqinisa ulwazi lwakhe emdlalweni. Uzitshaya isifuba, ezethemba ukuthi uyalincedisa iqembu lakhe ukuze liphumelele kuPSL.
IMWOS yangenela indawo yeZPC Hwange kuligi yePSL. Yagqiba isizini yeZifa enyakatho yelizwe ikunombolo yesibili, ngemva kweScottland.
Uluhlu lwemidlalo yeviki lakuqala kuCastle Lager PSL:
NgoLwesihlanu
Scottland FC vs Triangle United (Rufaro Stadium)
NgoMgqibelo
Herentals College vs TelOne FC (Rufaro Stadium), Simba Bhora vs FC Platinum (Wadzanayi Stadium), Manica Diamonds vs Yadah FC (Sakubva Stadium), Chicken Inn vs Bikita Minerals (Luveve Stadium), Kwekwe United vs Ngezi Platinum (Bata Stadium), Green Fuel vs Caps United (Green Fuel Arena)
NgeSonto
Dynamos vs ZPC Kariba (Rufaro Stadium), MWOS FC vs Highlanders FC (Baobab Stadium) Yonke imidlalo iqala ngo-3PM
