admin
CHIKWATA cheZimbabwe chekarate chakahwina menduru nhatu dzinoti yegoridhe, sirivha nebhuronzi kumutambo weAfrica Full Contact Organization Tournament wakatambirwa kuJohannesburg, kuSouth Africa svondo radarika pamberi.
Shasha iri kusimukira mumutambo uyu, Pumulani Maphosa – uyo anokwikwidza muboka reUnder 65 kgs – ndiye akakwanisa kuhwina menduru yegoridhe.
Vamwe vaikwikwidza mumutambo uyu ndiBrian Chiringa uyo akahwina menduru yesirivha muboka reOpen category kozoti Tangayi Mhlanga akahwina yebhuronzi.Madzimai maviri anoti Precious Kazembe naSharleen Amoda vakapihwa mukombe wekupedza vari pechina mumapoka eLight-weight neopen-weight.
Sensei Samson Muripo, uyo akaenda achitungamira chikwata ichi kumutambo uyu, anoti vakadzidza zvakawanda izvo vanotarisira kuzoshandisa mune mimwe mitambo inotevera. Sensei Muripo haana kukwikwidza sezvo aive mumwe wevaiongorora mitambo iyi.
“Takazama nepatinogona kurwa kuti tihwine menduru dzakawanda asi zvakakona, tinongotambira zvakatahwina izvozvo tichitarisa mafambiro atakaita kuenda kumutambo uyu.
“Vatambi vedu vakadzidza havo zvakawanda izvo tinofunga kuti zvichazovabatsira mune ramangwana ravo,” anodaro Sensei Muripo.
Online Reporter