admin
YiNtatheli kaMthunywa
Abazali babafundi besikolo seNyanda High School eGwabalanda koBulawayo bakhathazekile ngendlela abafundi bakulesisikolo asebechitha ngayo isikhathi sokufunda bephaquza insango abazithengiselwa liqula labafana ababefunda kulesisikolo.
Kubikwa lezi zigilamkhuba ziphathela abafundi insango kunye leminye imihlobo yezidakamizwa zingagqize qhakala zifike zidakise abafundi bakulesisikolo kungabi ndaba zalutho.
Lokhu kubikwa sokulesikhathi kusenzakala kunganakwa muntu kodwa izakhamizi zize zabambana zayabikela amapholisa okuyiwo aze abamba izigelekeqe lezi ebezizenzela umathanda kulesisikolo, uMthunywa uyakuveza lokhu lamhlanje.
UMthunywa ukhulumisane lomunye wezakhamizi uNkosazana Melisa Mthunzi ochaze ukuthi ngenxa yemithanithani eyenzakala kulesisikolo usebona kungcono ukuthi asuse umntanakhe kiso.
“Ngenxa yobugangi obukulesisikolo mina ngibona kungcono ukuthi ngisuse umntanami ayefunda kwenye indawo. Okusuka kungicaphule yikuthi ababalisi bakulesisikolo bayabekela abantwana bebhema imbanje esikolo angazi ukuthi bayabe bethi ngubani ozabakhuza.
“Kuthi kunjalo lamapholisa alinda esikolo ayekela lababantu okuthiwa babefunda esikolo lesi bengena lembanje kanye lotshwala esikolo bezonika abantwana. Angazi kumbe basuka babaphe imali yokubafumbathisa,” kutsho uNkszn Mthunzi.
UMthunywa wenelise njalo ukukhulumisana lesinye isakhamuzi sakulelilokitshi leLuveve uMnumzana Mqondisi Nyoni waveza ukuthi abalima kanye labathengisi bembanje lezi bayaziwa kulelilokitshi njalo kucatshangelwa ukuthi badla lamapholisa.
“Into esuka ingidanise yikuthi amapholisa ayabazi abantu abalima imbanje kulelilokitshi kodwa kawababophi.
Kutsho ukuthi amapholisa la abhema labo abathengisi bembanje laba ngoba engababamba ubabona sebephendukile bafike baqhubekele phambili ngokuthengisa imbanje lezi. Sesize sicabanga ukuthi mhlawumbe esitokisini bafika baphiwe imvumo yokuthengisa imbanje lezi ngamapholisa.
“Ngikhuluma nje kuviki ephelileyo babanjiwe abanye abathengisela abantwana besikolo imbanje kodwa omunye wabo ngimbonile okuchaza ukuthi babekele bazihambela,” kuveza uMnu Nyoni.
Ekhuluma lentatheli umeli weLuveve kudale lePhalamende uNtandoyenkosi Mlilo uchaze ukuthi kuliqiniso ukuthi kulezigangi ezithengisa imbanje kule indawo.
“Kuliqiniso sibili ukuthi kulezigangi esezifundisa abantwana besikolo ukubhema imbanje ngakho ezinye zakhona zibanjiwe kuviki ephelileyo. Khathesi ngisazobonisana labazali kanye lababalisi ukuze sincedisane lamapholisa ukubamba izigebengu lezi esezisona abantwabethu,” kuchaza uMnu Mlilo.
Ebuzwa ngale indaba uMqondisi wezemfundo koBulawayo uMnumzana Dan Moyo uchaze ukuthi indaba le ubengakayizwa ngakho basazoyihlolisisa.
“Indaba yama-school leavers athengisela abantwana besikolo utshwala kanye lembanje asikayizwa ngakho sisazoyihlolisisa ukuze ilungisiswe,” kutsho uMnu Moyo.
Isikhulumi samapholisa koBulawayo uInspector Precious Simango ebuzwa ngale indaba uchaze ukuthi bebengakayizwa.
“Indaba le kayikafiki kithi ngakho sizabuzisisa ukuze sizwe ukuba ngabe kuhamba njani ukuze zibotshwe izigangi lezo,” kuphetha uInsp Simango.
Online Reporter