Online Reporter
Innocent Kurira
UMBUZO okhona emulini yeHighlanders yikuthi ingaphi imali lokuthi leyo engenayo isetshenziswani njengoba abadlali bengaholi.
Le yindida yombuzo ongatholi impendulo, evela kubakhokheli baleliqembu eselilembali yokungaphathi kuhle abadlali bayo.
Akuqalisi lonyaka ngoba kade zavela indaba zokukhathazeka kwabadlali, bencitshwa imali, okulilungelo labo, nanko phela iBosso yazimisela kulokhu.
Njengoba kungacaci, abadlali ngoLwesithathu bafike bazihlalela, bala ukuqeqetshwa kuhlandla lokulolonga.
Ngubani ongadlalela ukhwelo? Yikho abazibuza khona abadlali laba.
Abalandeli abakade besithi iqembu “libotshiwe” bengabe sebekubona ukuthi udaba lwemali yilo oludala ukuthi abadlali behluleke lokuzinikela ngokupheleleyo emdlalweni.
Iphephandaba likazulu liphethe udletshana lokuthi abadlali bafuna ukuzwa kubaphathi beqembu ngesimo semali lokuthi bazabhadalwa nini, sekutheni.
Kulokhu, abadlali bafike enkundleni yokulolonga kodwa kabazange baqeqetshwe, njengendlela yokutshengisa ukukhonona kwabo.
Kuzwakala ukuthi abadlali, ithimba labaqeqetshi kunye labasebenzi abasehofisini kabakatholi iholo labo okwenyanga ezimbili, okuyisimo esiqhubeka sidala ukuphazamiseka eqenjini.
Bonke abadlali bebekhona ekuqeqetsheni kodwa bakhethe ukuhlala phansi bengazange benze lutho olubambekayo.
Omunye oseduzane lodaba utshele uMthunywa wathi:
“Kwenzakele njalo ngoLwesithathu ekuseni. Bafikile kodwa abaqeqetshanga. Udaba yilo. Nxa kungela mali, akudlalwa,” kutsho umfakazi lo.
“Bazama ukuthumela umlayezo kodwa besatshengisa ukuthi bazimisele ngokufika emsebenzini, kodwa kabajabulanga ngalokho okwenzakalayo.”
Isenzo lesi sitshengisa udubo oluhlala luphinda phinda kuleliqembu elikhulu lakoBulawayo, elike lahlangabezana lokuphazamiseka okufanayo ekuqaleni kwesizini.
Njengoba umdlalo weCastle Lager Premier Soccer League phakathi kweHighlanders leTriangle eBarbourfields Stadium ususondele, lesi isimo sidala ukukhathazeka.
Abaphathi beqembu bebengakakhulumi emphakathini ngaloludaba ngoLwesithathu, okutshiye kungacaci ukuthi kuza kwenzakalani eqenjini kumalanga alandelayo.
