Online Reporter
INHLONIPHO iyinsika yempilo yabantu abansundu. Lokhu kufakazwa yizitsho ezitshiyeneyo esilazo thina njengabantu abamnyama eziyizo ezisekela njalo ezipha imfundiso ngalokhu.
Ibhuku eliNgcwele lalo liyakuqonqosela lokhu nanko phela lithi: “Hlonipha uyihlo lonyoko ukuze insuku zakho zande lapha emhlabeni”. Esintwini nxa kukhulunywa ngoyihlo lonyoko akutshiwo abantu abakuletha kulumhlaba kuphela kodwa kutshiwo wonke nje umuntu omdala, loba nguphi umuntu olingana labazali bakho kumbe emdala kulabo nje.
Phela umntwana akakhuliswa ngabazali bakhe kuphela kodwa labanye abadala abasemphakathini balaso isandla ekukhulisweni kwengane.
Ngenxa yalesi sizatho sikubona kuqakathekile ukuthi abasakhulayo kumele bakhuthazwe ukuthi bakhule bengabantu abalembeko njalo abalenhlonipho.
Umntwana uhle afundiswe lokhu esesemncane nanko phela laso siyatsho isaga esithi “isigogo sigoqwa sisemanzi”, ngoba umntwana ungavele umkhuthe esemncinyane ngeke uphinde umkhuze kumbe umfundise inhlonipho ngoba uzakuthi ukhuluma yena ephulele izigodo endlebeni nje.
Isiko lenhlonipho kumele likhuthazwe ngempela kuzo zonke impiko zempilo ngoba kuqakathekile ukuthi umntwana azi ukuhlonipha kungakhathalekile ukuthi ungaphi njalo wenzani.
Kumele kugcizelelwe ukuthi akudingakali ukuthi umuntu uyisimakanjani kwezempilo, isiqokoqela yinhlonipho kukho konke akwenzayo lakubo bonke abantu ahlangana labo. Lakho ukuzihlonipha kuqakathekile nje ngoba umuntu ongazihloniphiyo uziphatha butshapha, atshaphaze impilo yakhe, isiphetho kube yikutshabalala kwakhe.
Kulezinsuku intsha yakithi kukhanya isilutshaya indiva udaba lwenhlonipho khepha isilingisela lokhu ekubona nsuku zonke kumabonakude. Uthola okhekhe bephikisana labadala, kuthethiswana njalo kuphendulwana kuzinhlelo lezi ezikhitshwa kumabonakude. Okungabantwana kwakithi kusuke kubone angani le yiyo impilo okumele kuyiphile kukanti hatshi.
Kubi kakhulu ukuthatha amasiko abanye abantu siwenze awethu ngoba thina siyisizwe ngokwethu njalo sileyethu indlela yokuphila kunye lokuphilisana. Kungakho-ke kuqakathekile ukuthi abadala baqonqosele ukuthi akekho umntwana ongelanhlonipho ongaphumelela empilweni yakhe ngoba inhlonipho ilakho ukumnika isithunzi emphakathini njalo imbumbe abe ngumuntu ebantwini. Ekadeni, imfundiso le ibihleli iqonqoselwa, kungakho-ke abadala balamuhla kumele bakwenze kube ngumlandu wabo ukuthi babone ukuthi bafundisa abantwababo inhlonipho isikhathi sisesekhona.
