Online Reporter
Nkosilathi Sibanda
BAZAtshompoka bengadinwa abathanda ubunandi lokuzithokozisa kuleli nanko iqembu le-Asante Mo libika ukuba liphethe uhlelo olutshisayo ngoMpakalazi.
Iqembu leli, eliqhunsa ingoma lemidlalo ebizwa kuthiwa yi-Afro Tech, libikele iphephandaba likazulu ukuthi kuluMpakalazi kuzafiwa ngobunandi.
Kube kuhle ukuthi i-Asante Mo ilungiselele imicimbi kaMpalakazi ngoba isanda kubalelwa kumaqembu alakho ukuthi aphiwe isicoco seBulawayo Arts Awards (amaBAA) ekupheleni kwalumnyaka kuhlandla le-Outstanding Alternative Music.
I-Asante Mo, okuliqembu lakoBulawayo, ililamalunga abalisela uMakhosi Mlotshwa, Bekithemba “Marabha” Phiri, Newman Gondwe, Leeroy Tshuma lo-Aaron Chikondawanga.
Ekhuluma lephephandaba likazulu ngoLwesibili kuliviki, uPhiri wazise ukuba kunengi abazakuphakulula kumaviki amabili azayo.
“Yebo, yes uMpalakazi selapha. Sizakwethula uhlelo lwemicimbi engasoke iphele umnyaka uze uyezavalwa. Kumaviki azayo sizakwethula idlalade lethu elohlobo lwe-EP. Lizajabulisa abantu, ngakho sithi i-Asante Mo kayipheli moya,” kutsho uPhiri.
Lokhe lasungukwa kuminyaka edluleyo, iqembu le-Asante Mo selithole inhlonipho ilizwe lonke. Selibizwa eHarare, Victoria Falls lakwamanye amadolobho lapho okuqoqwa khona imbuthano yobunandi kwezomculo lemidlalo.
NgoMabasa lonyaka abafana be-Asante Mo bakhipha umsebenzi wabo obizwa ngokuthi “Indandanda” owaboniswa endaweni ezinengi ezigoqela leTheatre in the Park eHarare.
