Online Reporter
Nkosilathi Sibanda
ZIBAKHALELE amadoda amabili atholakale elenqwaba yamabhokisi agcwele amambhodlela emithi yokukhwehlela.
Amadoda la, uLungani Freedom Ndlovu (44), ohlala koBulawayo loHerbert Kazembe (40) oweHarare, bamiswe emthethwandaba phambili kukamantshi eHarare ngecala lokutholakala belemithi engabhaliswanga emthethweni, kuMedicines and Allied Substances Control Act.
Kutholakale imithi etshiyeneyo egoqela iAstra cough syrup, Benylin, Broncleer, leStilpane.
Ugatsha lweNational Prosecuting Authority of Zimbabwe lubike ukuba mhlaka 30 Ncwabakazi lonyaka, amapholisa ohlangothi lwe-CID Drugs, avimba enye imota koBulawayo eyayisetshenziswa ukudlulisa imithi le, isuka eBotswana.
Kwabotshwa uNdlovu owayengumtshayeli wemota, owancedisa amapholisa ukuveza ukuthi usebenza loKazembe.
“Kwatholakala amabhokisi angu-465 (ayelamambodlela angu-13 950 awe-Astra syrup), amabhokisi angu-23 (ayelamambodlela angu-1 104 eBenyln), amabhokisi angu-40 (ayelamambodlela angu-2 000 aweBroncleer), amabhokisi angu-13 (ayelamambhodlela angu-650 eStilpane).
“Intengo yemithi le yi-$89 750 njalo yatholakala koBulawayo, phakathi kwemota yeNissan Caravan. UNdlovu, owayethunywe impahla le, wabotshwa wasesebenza kuhle lamapholisa, okwenza kwaba lula ukuthi kubotshwe uKazembe ePamamonya Abattoir eHarare mhlaka 1 Mpandula 2025. Bobabili basezandleni zamapholisa belinde ukuqhubeka kokuthethwa kwecala labo,” kutsho ugatsha lweNational Prosecuting Authority of Zimbabwe.
