Online Reporter
Danisa Masuku
KULOMFUNDI okuForm 4 eFounders High School koBulawayo omiswe emthethwandaba koBulawayo ngemva kokubanjwa elembanje esikolo.
Umfundi lo, esingeke siqambe ibizo lakhe ngesizatho sokumvikela, uvele phambi kukamantshi uMnumzana Themba Chimiso esetheswa icala lokutholakala elembanje.
Indaba yakhe idluliselwe kumhlaka 30 Mpandula njalo uzabe evalelwe esitokisini.
Umtshutshisi uNkosikazi Josiphine Gurazhira utshele inkundla ukuthi mhlaka 13 Ntulikazi 2026 ngehola lika-11 ekuseni, umfundi lo wahlolwa nguMsekeli kaMphathisikolo eFounders High School watholakala elamaphakethe amabili embanje phakathi kwesikhwama sakhe sesikolo.
Umfundi lo wahanjiswa eDonnington Police lapho acelwa khona ukuthi aveze imvumo kumbe ilayisensi emvumela ukuphatha imbanje, kodwa wehluleka ukuyiveza.
Ngenxa yalokho wabotshwa njalo wanikwa ifomu lokuthathelwa impahla elilenombolo ezithi 0046069.
Inkundla izwe ukuthi mhlaka 14 Ntulikazi ngehola lika-8 ekuseni, imbanje lezi zasiwa eZimpost ukuze kutholakale isilinganiso sazo.
Umfundi lo wayengelalungelo lokuphatha imbanje engelalayisensi kumbe imvumo.
Kusenjalo enye indoda ethengisa izidakamizwa ebangele isiphithiphithi ngesikhathi izama ukubalekela amapholisa, icele ibheyili emthethwandaba omkhulu wakoBulawayo.
UKalusha Makhosi Mthethwa (23) weNkulumane koBulawayo uvele izolo phambi kukaMnumzana Themba Chimiso esetheswa amacala amabili okuthengisa izidakamizwa eziyingozi.
UMthethwa uphike insolo lezi njalo ummeli wakhe uMnumzana Prince Bhutshe weBhutshe and Associates usecele ukuthi anikwe ibheyili.
UNkosikazi Gurazhira utshele inkundla ukuthi mhlaka 19 Mpandula 2026 ngehola lika-6 ntambama, amapholisa eBulawayo Central Operations athola umbiko wokuthi uMthethwa uthengisa izidakamizwa kuGeorge Silundika Street, phakathi kuka 8th lo 9th Avenue.
Amapholisa aya endaweni leyo afica uMthethwa ehlezi esitulweni somtshayeli emoteni yeHonda Fit.
Wathi ebona amapholisa wazama ukubaleka ngemota, wayitshayela.
Elinye ipholisa ladubula emoyeni limxwayisa ukuthi ame, kodwa kazange alalele.
Ipholisa laphinda ladubula amavili emota kodwa uMthethwa waqhubeka etshayela kuGeorge Silundika Street.
Amapholisa amlandela aze ambamba ngesikhathi engena kuMatopos Road eduze kweFamona Fire Brigade Station.
Amapholisa athi lapho ehlola uMthethwa lemota yakhe athola amaphakethe embanje angu-46, imali engange-US$1 451 kanye le-R456 esitulweni esiseceleni kwesomtshayeli.
Amapholisa abuye athola emoteni amambodlela angu-20 eBroncleer cough syrup angu-100ml, amabili eAstrapain syrup angu-100ml, ammbodlela angu-12 angelalutho eBenylin cough syrup ama-100ml kanye lamanye angu-14 angelalutho eBroncleer cough syrup angu-100ml.
Imithi le yonke ibiza imali engaba yi-ZWG3 180 emgwaqweni.
