admin
UKUZITHWALA kukamama yinto eqakathekileyo okumele ijatshulelwe ngumuntu wonke opheleleyo yikho nje nxa umama esekhululekile kuthiwa amhlophe.
Ungabona umuntu ehlukuluza umama ozithweleyo kuyabe kukhona okungekhoyo engqondweni yakhe. Ukuzithwala kukamama kuyisibusiso ngoba phela umdeni kunye lesizwe kuyanda. Kungakho-ke omama abazithweleyo kumele bahlonitshwe lasemisebenzini ngoba umkhulu umsebenzi abawenzayo ngokuletha abantwana abazakuba yikusasa yelizwe.
Siyake sizwe ngabanye omama abaxotshwa imisebenzi ngoba phela sebezithwele. Lokhu kubi njalo kulubandlululo olwenyanyekayo ngoba phela umsebenzi wabomama uqakathekile kodwa owesifazane kasoze ekele ukuzala ngenxa yokuthi uyasebenza.
Kambe bona abalwela inkululeko bangathini ngendaba enje njengoba batshiya imizi kanye lezimuli zabo bengena iganga ngenxa yokufuna inkululeko? Ngeke kubajabulise sibili ngoba isiphatho esibi sabantu abamnyama sasala eRhodesia, eZimbabwe akukhangelelwa lokhu.
Kuyisimanga-ke ukuthi lubaba uhlukuluza lumama ozithweleyo elizweni labokhokho bakhe ngento eyadalwa nguNkulunkulu.
Akusicala ukuzithwala njalo ukusebenza akumelanga kuvalele umuntu ukuthi abe labantwana.
Kambe kuqondile na ukuthi umama ophethe umphefumulo womunye umuntu ahlukuluzwe kanje? Phela kuthiwa umama ozithweleyo akumelanga ahlukuluzwe ngoba kungabangela ukuthi iBP yakhe ikhwele okungacina kulimaza umntwana.
Kuyinto enhle ukuthi abantu babambane ekulwiseni ububi ngoba endaweni ezinjalo bajwayele ukunqoba.
Nxa uHulumende wafaka umthetho wokuthi umama angazithwala kumele aphiwe amalanga engekho emsebenzini wena ungubani ongawephula lowomthetho?
Ungubani wena ongaxotsha umama umsebenzi ngoba ezithwele?
Angithi lawe owakho umfazi uyabe ufuna asebenze ngapha ekuzalela abantwana. Kuhle sihloniphe omama ngomsebenzi omkhulu abawenzayo ngokusizalela isizwe sakusasa, ukusisebenzela kanye lokusigcinela imizi yethu.
Bayake batsho ukuthi: ‘wathinta umfazi wathinta imbokodo’, kungakho-ke labo abalwisana lamalungelo abomama bayiziwula.
Online Reporter