admin
YiNtatheli kaMthunywa
UKWANDA kwenhlelo zengqubekela phambili eLupane sekufuqe abazemidlalo ukuthi basungule imncintiswano yomdlalo wokuqaga ngemva kwesikhathi eside ungekho.
Umdlalo lo, ubusaziwa udlalwa ezikolo ezilenkundla ezifaneleyo, kodwa bezinlutshwane izikolo ezilenkundla lezi, okudale ukuthi inengi lalabo abalethalenta beqiwe ngamathuba.
Umdlalo wokuqaga emaphandleni ukubanga eliphansi njalo awukatholi usekelo olufana lakweminye imidlalo.
Elizweni leZimbabwe ibhola lokuqaga alithathelwa phezulu kodwa kuthe iqembu lesizwe kumdlalo amaGems, lisabalala lisiyancintisa kuWorld Cup kuminyaka edluleyo, kwabalokuphakama kulabo ababewuthathela phansi.
Ngaphandle kwemidlalo yezikolo, inkundla zokudlala i-netball kunzima ukuzithola ikakhulukazi ngenxa yokuthi awulasekelo.
Ukuphumelela kweqembu lesizwe kwakhuthaza ezinye inkokheli labaqeqetshi bomdlalo ukuthi basungule iLupane Netball Club. Kulandela ukusungulwa kweLupane Netball Club, sebebanengi abantu abalandela lumdlalo.
Iphephandaba likazulu lixhumane lomqeqetshi weLupane Netball Club u-Issac Magondo obike ukuba ngendlela umdlalo wokuqaga osusekelwa ngayo ngababukeli, sekusele ukuthi kube losekelo lwemali ezakhuthaza ithalenta.
UMagondo uthe kunsuku ezisanda kudlula, iqembu lakhe lethekelele esiqintini seMabale lapho ebelinxuswe ukuthi liyedlala lamaqembu akhonale.
EMabale lakho umdlalo wokuqaga usasephansi.
“Sifuna ukutshintsha izinga lomdlalo esikuwo. Amabombo abhekise kuNational League ngoba yikho la abadlali bethu okumele bancintise khona,” kutsho umqeqetshi lo.
“Singelamali akulutho esingalwenza. Sinxusa bonke abangasincedisa ukuthi basisize kulokhu.
UThandolwenkosi Nyoni, isakhamuzi seLupane ophinda abengumqondisi wenhlanganiso yeCatch Them Young, utshele uMthunywa ngoLwesibili ukuba ukuza kweLupane Netball Club kuphathisa abantwana abangamankazana ukuthi bakhuthalele ezemidlalo.
“Abazali bakulindawo bayajabula nxa sekukhulunywa ngokuphakanyiswa kwemidlalo. Siyakubongela ukuthi iLupane Netball Club iba ngumzekeliso wokuthi ezemidlalo ziyinsika yempumelelo endaweni yakithi.
“Nxa singakhuthaza abafundi, lalabo asebaqeda isikolo kodwa belethalenta lezemidlalo ukuthi bengahlaleli izandla.
Amankazana awabuye ahlangane lamanye kudlalwe. Singakhohlwa kodwa ukuthi konke lokhu kudinga usekelo lwethu njengezakhamuzi, osomabhizimusi labazali,” kutsho uNyoni.
UPermanent Sibanda ongomunye wamalunga enkokheli ezemidlalo eLupane uthe okubalulekileyo yikuthi inhlelo zengqubekela phambili esezivuswe eLupane zisekelwe yikusungulwa kwemidlalo.
“Imidlalo iqakatheke kakhulu ekwakheni Ubuntu kwabasakhulayo. Sikholelwa ukuba ingqubekela phambili esilethwe nguHulumende idale utshintsho lakwezemidlalo yethu.
“Sikhangelele ukwakhiwa kwenkundla ezemidlalo ezitshiyeneyo ukwenzela ukuthi abasakhulayo bathole ukuzilibazisa lamathuba okutshintsha impilo zabo,” kuSibanda lo.
Online Reporter