Online Reporter
Langalakhe Mabena
KONKE sekumi ngomumo kumcimbi wezomculo oweKings and Queens Concert ozaqhutshwa ngaphansi kweBulawayo Arts Festival (BAF) mhlaka 4 Nhlangula.
Umcimbi lo uxhaswa yikhansili yedolobho lakoBulawayo njalo uyingxenye yemcimbi yokuthakazelela ukubizwa koBulawayo njengedolobho.
Umkhosi weBAF walonyaka uzaqhutshwa kusukela mhlaka 2 kusiya ku- 4 Nhlangula 2026 ngaphansi kwesihloko esithi, “Building Bridges, Preserving Connections.”
IKings and Queens Concert ikhangelelwe ukudonsa ixuku labathandi bomculo abavela koBulawayo lakwezinye indawo ukuze bazokholisa umculo ovela kubahlabeleli abadumileyo labasacathula.
Phakathi kwabaculi abazabe bekhona kubalwa uMzoe 7, Bhila, Mandie Mae, Macala, Matojeni Melo-Maniacs, MJ Sings uPhathi Ncube labanye.
Umcimbi lo uzaphathwa nguCde Phil lo Mma Nare abangabakhokheli bomcimbi abazagcina abantu bethokozile ubusuku bonke.
Abaqoqi bomcimbi bakhangelele ukuthi leli kube lithuba lokuqinisa isithunzi sedolobho lakoBulawayo njengelinye lamadolobho ahamba phambili kwezamasiko lobuciko eZimbabwe.
Abathandi bomculo bakhuthazwe ukuthi baphume ngobunengi babo bezojabula lokunanza ubungcitshi babaculi bakulelidolobho.
