Online Reporter
Mthokozisi Ncube
IMULI kaTalent Masuku obesaziwa kakhulu koBulawayo lasenkundleni zokuxhumana, ifuna impendulo kulandela ukufa kwakhe ngemva kokugula esejele.
UTalent, obeleminyaka engu-30 yokuzalwa, wedlule emhlabeni esibhedlela seMpilo Central ngoLwesithathu ekuseni, ngehola lesine. Wayelaliswe esibhedlela mhlaka 22 Nkwenkwezi.
Obabakazi bakhe, uVivian loNora Masuku bakhulume ngobuhlungu ngesikhathi bexoxisana lentatheli, besithi kabazi ukuthi kwenzakalani.
UVivian wehluleke ukuzibamba, wakhala ngesikhathi echaza okwenzakala ngaphambi kokutshona kukaTalent.
“Sibuhlungu kakhulu ngoba ngesikhathi umalume wakhe emvakatshele ejele wayephilile njalo ekhuluma kuhle. Besingalindelanga ukuthi sizwe ukuthi usefile,” kutsho uVivian.
Uthe imuli kayitshelwanga ukuthi uTalent wayelaliswe esibhedlela.
UNora uthe bathola indaba ngomakhelwane owabona uTalent esibhedlela mhlaka 23 Nkwenkwezi wabatshela.
“Saziswa ngomunye umuntu. Akulabantu bejele abasitshelayo ukuthi wayesesibhedlela,” kutsho uNora.
Izihlobo zithi zahle zaphuthuma esibhedlela ngemva kokuzwa lokhu.
“Sithe sifika satshelwa ukuthi wayesehlale amalanga engadli futhi wayedinga ama-drip lemithi ngokuphangisa,” kutsho uNora.
Umdeni uthe iziphathamandla zejele zabatshela ukuthi uTalent wayedinga izinto zokwelatshwa ukuze aqale ukudla njalo.
Lanxa bebebhekane lobunzima bemali, izihlobo zaqoqa imali mhlaka 27 Nkwenkwezi ukuze zithenge ama-drip lemithi eyayifunakala.
Ngokutsho komdeni, uTalent wayengasadli kusukela ngesikhathi alaliswa esibhedlela.
Umdeni utshele iphephandaba leli ukuthi iziphathamandla zejele zabacela ukuthi bazomlanda esibhedlela mhlaka 28 Nkwenkwezi bengazi ukuthi wayesefile.
“Cabanga nje ukufika kwethu esibhedlela sitshelwa ukuthi usefile. Sicine ukumbona emthethwandaba nyakenye kuphela.
“Umalume wakhe nguye yedwa owayevunyelwa ukumvakatsha ejele njalo nguye kuphela owayevunyelwa ukumbona esibhedlela,” kutsho uNora.
Imuli iphikise imbiko ethi uTalent wayegula ngengqondo, besithi uhlupho lwakhe lwaqala kudala ngemva kokusebenzisa imithi eyamphatha kubi.
“Wazalwa eleHIV kodwa waqala ukunatha imithi esekuFomu 2. Imithi leyo yamphatha kubi kakhulu kwadala ukuthi siyemhlolisa ingqondo
“Ngelinye ilanga wabuya esikolo elezilonda ezimbi emzimbeni ngemva kokunatha imithi njalo yikho okwaba yisiqalo senhlupho zakhe,” kutsho uVivian ezama ukubamba inyembezi.
Bath bamhambisa esibhedlela seNgutsheni ukuze ahlolwe kodwa odokotela bathi wayengaguli ingqondo.
Lanxa wayesebhekane lenhlupho empilweni yakhe, izihlobo zithe wayethandwa yimuli njalo wayesaziwa ngabantu abanengi koBulawayo.
Abantu babuthene ku-4476 eMganwini, eMasotsheni koBulawayo.
Kusenjalo, imuli icela usizo lokuqhuba umngcwabo okugoqela ukuthengwa kwebhokisi, imota yokuyangcwaba eMatopo Mission lokudla kwabantu abazabe besemngcwabeni.
Imizamo yokuthola imbiko kuPrincipal Correctional Officer Garainashe Moyo yehlule ngoba ubengaphenduli ucingo loba imilayezo yeWhatsApp.
Ngo-2025, uTalent wabhalwa kakhulu emaphephandabeni ngemva kokugwetshwa etholakale elecala lokweba iUS$150 kowesifazane eduzane lo 6th Avenue loJason Moyo Street koBulawayo.
