Online Reporter
Thupeyo Muleya
UHLANGOTHI olukhangela ngokuphathwa kwemgcele eSouth Africa, iBorder Management Authority (BMA) lubike ukuba kubanjwe abantwana abancane abedlula i-20 ngoLwesine, bezama ukuchaphiswa umfula uLimpopo, duzane leBeitbridge.
Abantwana laba bebeseqiswa umgcele okungekho emthethweni, beqonde eSouth Africa.
I-BMA ibincedisana lebutho leSouth African National Defence Force (SANDF) kulumsebenzi.
I-BMA ithe abantwana abavinjiweyo baleminyaka yokuzalwa ephakathi kwemihlanu kusiya ku-17. Ithe kuleliqula bekulabantu abadala abangu-10.
Kuphenyo olwenziweyo, kutholakale ukuthi kulomuntu omdala oyedwa kuphela obengumzali womunye umntwana, ikanti abanye abantwana bebehamba bodwa.
EZimbabwe, abe-Immigration Regional Compliance and Enforcement Unit ibike ukuba kwabotshwa abantu abangu-3 640 ngoMpalakazi kuphela ngenxa yamacala ehlukeneyo aphathelane lemisebenzi engekho emthethweni.
Phezu kwalokho, izihambi ezingu-27 ezivela eNigeria, South Africa, DRC, Zambia, Ghana, Egypt, Mozambique, Malawi, Burundi leCongo-Brazzaville zilelwe ukungena eZimbabwe ngenxa yokungabi lamavisa afaneleyo.
Ukuvinjwa kwabantu emgceleni weZimbabwe leSouth Africa kuyingxenye yomkhankaso owenziwa yiziphathamandla zamazwe womabili wokulwa lokungena kwabantu okungekho emthethweni
Umqondisi weBMA, uDokotela Michael Masiapato, uthe:
“Bonke abantu laba sebebekwe ngaphansi kokunakekelwa yiziphathamandla ezifaneleyo, njalo kulandelwa indlela ezifaneleyo zokuthi bathole ukuphepha, inhlalakahle lokuphathwa kuhle kwabantwana okusemthethweni, njengokuhambelana lemithetho yeSouth Africa kunye lezinqumo zokuvikelwa kwabantwana.”
