adminCornelius Luphahla
ZIBUKELE ibhayisikopo yamahala izakhamizi zelokitshini leCowdray Park koBulawayo ngemva kokuba enye indoda ibhuqwe kabuhlungu ngumkayo encedisana letshamali yalindoda kubangwa ukungethembi kwendoda le.
Indaba le yenzakale ngoLwesihlanu kuviki ephelileyo lapho uDoubt Sibanda odindwe khona ngumkakhe uMonica Mataranyika encedisana letshamali yomkakhe uItai Moyo kubangwa ukuba uSibanda ubesejola njalo waqamba amanga ethi yena kathathanga.
Kuzwakale ukuthi uMnu Sibanda wayesehlala ebuya ebusuku nxa evela emsebenzini okwadala ukuthi umkakhe uMataranyika acabangele ukuthi kukhona osokutshaya amanzi kumkakhe wasedingisisa waze wabona ukuthi umkakhe uhlanyiswa nguNkszn Moyo.
UMthunywa uxhumane loNkosazana Julia Dube oyisakhamuzi sakule indawo wachaza ukuthi uMnu Sibanda wayesehlala ebonakala loMaMoyo kusukela emini yantambama kuze kube sebusuku.
“USibanda wayehlala ebonakala ethandelane loMaMoyo engelandaba lokuthi abantu abambonayo bayamazi.
Ngokubona kwami kukhona abantu abatshela umkakhe ngoba into le eyayisenziwa nguSibanda yayingajabulisi muntu. Okusuka kungimangalise yikuthi kuthiwa watshela uMaMoyo ukuthi yena kathathanga yikho nje kwamanye amalanga wayezilalela khona,” kutsho uNkszn Dube.
UNkszn Dube uqhubekele phambili njalo walandisa ngokutshaywa kukaSibanda ngumkakhe letshamali yakhe.
“Kuthe ngoLwesihlanu ngeviki phelileyo kuntambama uMataranyika wabiza amanina wonke ahlala eduze laye wathi azobona ukuthi indoda exhwalileyo iqondiswa njani. Samlandela-ke waze wayafika eFly Over lapho esandise ukubona khona umkakhe eloMaMoyo, lakanye bathutsha njalo behamba bonke bethandelene.
“UMataranyika wacatsha wasevumbuluka lemvubu esebona ukuthi izithandani lezi sezidlula lapho esasikhona.
Wasukela umkakhe wamdweba kakhulu uMaMoyo laye wavumbulula induku yakhe ayeyifihle ezigqokweni bamtshaya kakhulu uSibanda wabaleka waze wayacatsha kwenye indlu okuyikho abamlamulela khona.
Ngokubona kwami uMaMoyo loMataranyika babekhulumile ukuthi batshaye uSibanda,” kuveza uNkszn Dube.
Ebuzwa ngale indaba uNkzn Mataranyika uchaze ukuthi ukuxabana kwakhe lomkahe yimfihlo yabo ngeke abikele muntu.
“Kuliqiniso sibili ukuthi sike saxabana lomkami noma nje sesikulungisile kodwa ngeke ngakulandisela muntu lokhu ngoba yimfihlo yethu njengemuli,” kutsho uNkszn Mataranyika.
UNkszn Itai Moyo ubikele intatheli ukuthi kuliqiniso ukuba bake baxabana loMnu Sibanda.
“Ngiyavuma sibili ngike ngaxabana loSibanda noma nje siphethe siyilungisa indaba yakhona. Ekuxabaneni kwethu besibanga ukuthi kazange wangitshela ukuthi uthethe ngesikhathi engiqomisa okwadala ukuthi angixabanise lomkakhe, yikho-ke sabonisana ukuthi kungcono simtshaye,” kuveza uNkszn Moyo.
Imizamo yokukhulumisana loMnumzana Doubt Sibanda yehlule ngoba ucingo lwakhe lwalile ukungena.
Online Reporter