Online Reporter
Fungai Muderere
ABAFANA abadabuka koBulawayo, abomdlalo wenguqu womhlobo weFive-A-Side, iGo Boyz, baqede umnyaka lo ngenjabulo kulandela ukuba zintshantshu zalumdlalo elizweni lonke.
Lakho bekufanele ukuthi babizwe njengengqwele ngoba akukabi ngitsho leqembu elilodwa elenelisa ukuthi linqobe phezulu kwalo isizini yonke.
Ngokunjalo, ukudlala kweGo Boyz kunconywe yinhlanganiso yeNational Futsal League enikeze abadlali baleliqembu izicoco kunye lenkezo yabo.
Umqeqetshi walo, uMichael Gumede, ukhethwe njengomqeqetshi owenze kuhle kulisizini (Coach of the Year), kuyilapho umdlali wabo olethalenta elinzima, uThabani Mlilo, ethole izicoco ezimbili, ethatha esomdlali womnyaka (Best Player of the Season) kunye lesokuba ngohlohle amabhola amanengi (Top Goal Scorer of the Season).
Umqeqetshi uGumede uthe balokuthaba ngokuphiwa kwabo izicoco.
“Sithe sibumba iqembu, savumelana ukuthi kulisizini sizadlalela igolide kuphela. Sikwenzile lokhu, siyaziqhenya njalo sifuna ukuqhubeka ngokufanayo,” kutsho uGumede.
Iqembu leNedbank FC, eliqede likundawo yesibili, lithole imendulo zesiliva, kuthi iTNS Rovers ithole ezethusi ngemva kokuqeda kundawo yesithathu.
Umgcinisihlalo wekhomithi ebambe imincintiswano kuZimbabwe Football Assocition uSikhwicamfundo Thomas Marambanyika ukhuthaze amaqembu wonke akuNational Futsal League ukuthi aphakamise umdlalo ukuze enelise ukudonsa abaxhasi bemali. Lomongameli weNational Futsal, uPhilani Banda wengeze kumazwi la wathi: “Okumqoka yikuthi umdlalo wethu ube labalandeli abanengi.
Singabukelwa kakhulu, kuzadala ukuthi sikhange amehlo alabo abangafuna ukusincedisa ngemali.
“Sithi amhlophe kuntshantshu zethu zika2025 iGo Boyz. Sibonga wonke amaqembu azimisele ukuthi adlale.”
