admin
Nkosilathi Sibanda
INKOKHELI ezibambe intambo kumdlalo we-basketball esabelweni seMatabeleland North ibika ukuba kulimpelaviki inxuse amathimu akoBulawayo ukuthi azancintisana lalawo akulelodolobho.
Imidlalo le kubikwa ngeminye eqoqelwe ukuvula umnyaka omutsha njalo ilenjongo yokuvuselelela i-basketball edolobheni leHwange. IHwange ngelinye lamadolobho asalele emuva kumidlalo efana lale.
Umongameli we-basketball eMat North uPendrick Ndlovu uthe inhlanganiso yabo iqoqe imidlalo elomvuzo wenkezo ngoba behlose ukuvula umnyaka omutsha lokukhuthaza amaqembu aseHwange ukuthi aqhubekele phambili ngokudlala.
Amaqembu anxusiweyo abalisa iHwange Heats, Black Dime, Ghetto Magic, iUnicorns, iVictoria Falls Clippers leIngagula.
Ngomnyaka ophelileyo inhlanganiso ye-basketball eMat North yenze umkhosi ofanayo loba nje kwakubizwe amathimu amalutshwane.
Iqembu leUnicorns elesatshwa kanzima edolobheni leGweru yilo elanqobayo kumncintiswano wakuqala.
Ithimu le yatshengisa amathimu eMat North ukuba kulumdlalo kusebenza ubude, isiqubu lengqondo ezikhaliphileyo kuphela.
UNdlovu ubikele iphephandaba likazulu kuliviki ukuba bazavuthisa inkundla zeHwange Sports Pavillion.
“Sesiphindile njalo esakwenza ngomnyaka odluleyo kodwa okwakhathesi sincintisela ukuvula umnyaka. Iqula lethu njengenkokheli ze-basketball eMat North lijonge ukuthi sikhuthaze amathimu, ikakhulu aseHwange ukuthi angadeli ngokudlala lumdlalo.
“KoBulawayo sikhethe iCity Knights leLupane State University. Iqembu eliyintshantshu enkabazwe iUnicorns layo izabe ikhona,” kutsho uNdlovu.
UNdlovu uthe kulisizini, inhlanganiso yabo izasebenza lezikolo ezilesifiso sokudlala i-basketball.
“Kulisizini silomsebenzi omkhulu wokwenza ukuthi i-basketball ithole usekelo kubathandi bemidlalo lamankampani.
Loba silamathimu amalutshwane kuligi yethu, kuzakuba linyathelo elihle lokuthi sincedisane lezikolo ukuze sibumbe amathimu amanengi.
“Lokhu sikwenza minyaka yonke ngoba sifuna kwazakale ukuthi umdlalo we-basketball usuphendukile eMat North.Inhlanganiso yethu ayikaze yehluleke ukuqoqa imidlalo njalo asikaze sehluleke ukuqala ngesikhathi esiyiso.”
Online Reporter