Online Reporter
Brandon Moyo
INHLANGANISO yeZimbabwe Cricket isiqalile amalungiselelo omqhudelwano wenkezo yomhlaba owe-International Cricket Council Under-19 ozaqhutshwa kuleli laseNamibia ngomnyaka ozayo.
Sokukhethwe iqula labadlali abalitshumi lanhlanu, asebephakathi kohlelo lokulolonga eHarare.
Umqhudelwano lo uqalisa mhlaka 15Zibandlela usiyaphela mhlaka 6Nhlolanja. Ozakuba ngukaputeni nguSimbarashe Mudzengerere.
Kuzadlala amazwe alitshumi lasithupha kumidlalo engu-41 kusukela kuhlandla lamaqoqo, iSuper Six, semifinal lomdlalo wokucina, ozadlalwa eHarare. Inkundla ezikhethiweyo yiHarare Sports Club, Takashinga Cricket Club eHarare leQueens Sports Club koBulawayo.
IZimbabwe ifakwe kuqoqo lika-D ndawonye leNgilandi, Pakistan leScottland njalo zonke zizabe zisenkundleni yeTakashinga Cricket Club. Kumdlalo wakuqala iZimbabwe izadlala leScottland mhlaka 15Zibandlela, kulandele umdlalo leNgilandi mhlaka 18, kucine owePakistan mhlaka 22.
Andubana kuqalwe umncintiswano, iZimbabwe izakuba lomdlalo wobungane leqembu leMelika enkundleni ye-Old Hararians Sports Club mhlaka 10 Zibandlela. Izaphinda ilungiselele njalo kumdlalo leNew Zealand eMasvingo Sports Club, mhlaka 12Zibandlela.
Iqembu leZimbabwe kukhilikithi yama-Under 19:
Simbarashe Mudzengerere (Captain), Kian Blignaut, Michael Blignaut, Leeroy Chiwaula, Tatenda Chimugoro, Brendon Senzere, Nathaniel Hlabangana, Takudzwa Makoni, Panashe Mazai, Webster Madhidhi, Shelton Mazvitorera, Kupakwashe Muradzi, Brandon Ndiweni, Dhruv Patel, Benny Zuze.
