Online Reporter
Nkosilathi Sibanda
UHULUMENDE usekhuthaze amapholisa ukuthi asebenzise wonke amandla alawo njalo angesabi ukulwisana lokubopha abantu abathengisa izidakamizwa kuleli.
Ngokunjalo, uHulumende usebike ukuba umkhankaso wokuqeda ukuthengiswa lokusetshenziswa kwezidakamizwa uzaqhubeka kuze kufike kubanga lokuthi umphakathi usuphephile, kuvikelwe abasakhulayo.
Lokhu kuvele kumbiko womhlangano weKhabhinethi wetshumi lasitshiya galombili ngoLwesibili lapho okubikwa ukuba kwabotshwa abantu abangu-1 445 ngamacala okuthengisa izidakamizwa eziyingozi izwe lonke, kusukela mhlaka 12 Mbimbitho kusiyafika mhlaka 2 Nhlangula lonyaka.
UMphathintambo wogatsha lwe-Information, Publicity and Broadcasting Services kuHulumende uDokotela Jenfan Muswere uthe: Abe-Criminal Investigations Department baphiwa ama-drones amahlanu lugatsha lweLocal Government lePublic Works ngenjongo yokuthi kuhlolwe imingcele yelizwe okuhambisana leSupply Reduction Pillar. Kubotshwe kwavezwa emphakathini abantu abangu-41 abathengisa izidakamizwa. Baphiwa izigwebo ezisukela kunyanga ezingu-12 kusiya kuminyaka engu-15 ejele, kwaphinda kwabotshwa abangu-1 445, kubika uMphathintambo uDkt uMuswere.
Uthe uHulumende uyazi ngokuqakatheka kwenhlelo zokuphathisa abasakhulayo ukuthi baphile impilo engcono, benqabele ukusebenzisa izidakamizwa. Ngokunjalo, ugatsha lwe-Youth Empowerment, Development and Vocational Training lufinyelele abasakhulayo abangu-212 426 kumikhankaso lapho obekulezifundo zobukhokheli, inhlelo zokuphatha imali lokusungula amabhizimusi. Abasakhulayo abangu-7 349 bafundiswa ngokufuya inhlanzi, iMbire Goat Project, Presidential Youth Empowerment Scheme lokufundiswa ngokuphatha imali yiTonganyika Trust.
