Online Reporter
Ugwalo lulotshwe nguTommy Matshakayile Ndlovu lo Doris Nomathemba Ndlovu belo Bekithemba Sodindwa Ncube
Abafelwe ngumkabo
Kuviki ephelileyo sizwe ukuthi abanye babengcwatshelwa esibayeni, phakathi.
Owayengcwatshelwa esibayeni kwakungafanelanga kube ledundulu, okutshengisa ukuthi kulengcwaba.
Kwakugqitshelwa inhlabathi, kwendlalwe kuhle besekubuyiselwa umquba kuhle, kubesekudungwa ukuze kufanane.
Zigxobagxoba nje zazibezichelwa ngomuthi okuthiwa lixolo, laye umufi ebikelwa kuthiwa; “Nanzo inkomo zakho, uzikhangele kuhle, ungahambi lazo, zisale zisondla abantwana.”
Umuthi osetshenziswa ekwelapheni izifuyo zivikelwa ebubini obufana lokufa, ukuphunza, ukugula, ukulahleka njalonjalo.
Owesintwana loba abesintwana abefelwe ngumkabo akumelanga balale ngomhlubulo umkabo engakalahlwa.
Kuthiwa umuntu angalala umuntu engakangcwatshwa uba lobulungwana.
Ubulungwana ngumkhuhlane wobuthongo omenza alale loba ehamba.
Kwakuthi njengobana ubuthongo buyinkosi bubajume, belokhu behlezi beyame umduli. Umninimuzi wayefanele athi esiyangcwatshwa ephuma endlini yakhe enkulu.
Kwakuthiwa lanxa ebegulela endlini yomfazi omncinyane, bathi labo abamongayo bangabona ukuthi sekunzima bamthuthe bamuse endlini yomfazi omdala.
