Kubotshwa inina elitshaye umntwana

Belindah Chikandiwa

AMAPHOLISA abika ukuba asebophe inina elaphuma kwenye ividiyo ebisabalala kunkundla zokuxhumana litshaya umntwana, limbophe izandla lenyawo.

Isehlakalo lesi, esesigcwele enkundleni zokuxhumana, senzakale kuVillage 28, Mount Zonzwe, eMarange esabelweni seManicaland.

Kubikwa isehlakalo lesi senzakala ngenyanga kaNcwabakazi.

Inina leli kubikwa ngu-Idah Mushayi oleminyaka yokuzalwa engu-27, njalo umntanakhe lo akade emtshaya uleminyaka yokuzalwa engu-11.

Kuvidiyo leyo uMushayi utshaya indodakazi yakhe ngomchilo ophindiweyo, abuye ahlale phezu kwayo elokhu eyibhaxabula.

Kumbiko wamapholisa okhitshwe ngempelaviki, inina leli latshaya umntwana limethesa icala lokutshontsha i-US$11.
“Kulandela ukudingisisa, amapholisa eZimbabwe Republic Police asebophe umetheswacala,” kutsho isikhulumi samapholisa elizweni uCommissioner Paul Nyathi.
“Amapholisa eZimbabwe Republic Police agcona udlame olubhekiswa ebantwaneni. Sikhuthaza abazali ukuthi baqondise abantwababo ngendlela eyiyo njalo engeladlame.”