Online Reporter
YiNtatheli kaMthunywa
AMAPHOLISA abika ukuba phakathi kwamalanga amane adluleyo abophe abantu okucatshangelwa ukuthi yizigebengu ebezihlasela emadolobheni amanengi, zintshontsha imali, izimota legolide.
Izigebengu lezi besezihluphile koBulawayo, eHarare, Mutare laseGweru.
Kubikwa amanye amacala ababotshelwe wona enziwa ngoNtulikazi ngomnyaka ka-2023.
“Ukubotshwa kwabasolwa okukhulu kwenzakale kusukela mhlaka 24 kusiya kumhlaka 26 Ntulikazi,” kubika isikhulumi samapholisa elizweni uCommissioner Paul Nyathi.
Uthe koBulawayo amapholisa eCID Homicide abophe imigulukudu emithathu uMthandazo Ndlovu (40), Amard Ncube aka Jah (43) loSolomon Ngwenya (36).
Bobathathu batholakala bephethe iVizor pistol, ifakwe inhlamvu ezintathu, bephethe njalo i50 rounds ze-0.38mm, 15 rounds zeVizor pistol, i48V ye-battery le-lithium le-US$3 100.
Amapholisa athe iqula leli lingabe lithinteka kumacala ayisikhombisa okubamba inkunzi, kubalisela lokweba iUS$500 000 edobheni leHarare mhlaka 16 Nhlangula.
Bagaxwe lecala lokuhlasela lapho okuthelwa khona amafutha ezimota kuKhami Road koBulawayo lapho abatshontsha khona i-US$31 265, R3 720 leToyota Runx. Baphinda njalo laseMagwegwe, babaleka leR83 000 lefoni.
“Abasolwa laba basebehluphile. Ukubotshwa kwabo kubelula ngoba amapholisa athole udletshana kuzulu,” kubika amapholisa.
Kusenjalo, eHarare amapholisa avale ukutshontshwa kwe-gold carbon eBeatrice Mine.
Kubotshwe uFortune Banda (34), Promise Tshuma (30), Vincent “Dollar” Tembedza (27) loQueensley Ncube (25).
Kubikwa ekubotshweni kwabo kutholakale umbhobho we-9mm Deryia pistol, ama-magazine amabili, enye igcwele le-15 rounds.
Edolobheni leMutare kubotshwe uMarshal Munashe Munyuru (38) ngokutshontsha izimota ezintathu ezidulayo eSouth Africa.
Kwatholakala iToyota Fortuner, Ford Ranger Raptor leMercedes Benz.
Amapholisa athe abonga ukuphathiswa yizizalwane zakuleli.
“Sincoma ukuthola ulwazi oluvela kuzulu, okudale ukuthi kubotshwe abasolwa laba.
“Asiqhubekeni sisebenza ndawonye. Imibiko mayelana ngamacala ingabekwa kunombolo ezithi: (0242) 703631 kumbe ku WhatsApp 0712 800 187,” kutsho uuComm Nyathi.
derick.khumalo