Online Reporter
Ethel Ncube
KULAMADODA amabili abotshwe ngoMvulo kuyonale iviki kulandela ukungenisa amabhele amahlanu embanje evela kweleSouth Africa.
Abetheswacala, uTinashe Chivende (27) oweDulibadzimu eBeitbridge kunye lo Emmanuel Runesu owendaweni efanayo eBeitbridge kubikwa bebethwele amabhele embanje la abiza iR200 000 bewasa eHarare.
Kubikwa mhlaka 28 Nhlangula ngehola lesibili ebusuku amapholisa amukela udletshana lokuba kulemota yohlobo lwe-Toyota Wish, elenombolo ezithi AEQ 3565 etshayelwa nguChivende ethwele izidakamizwa eziyingozi.
Imota le kubikwa yayihamba ngomgwaqo weMazunga ukuze babalekele ukuhlolwa eMakado Security roadblock.
Kubikwa amapholisa aqonda eBubye Valley Conservancy lapho abafika babambisana lamaGame Ranger eBubye Valley Conservancy.
Bathi bebona imota le bayimisa andubana bayihlole, benelisa ukuthola amabhele amahlanu kunye lezikhwebu ezingu-11 zembanje emoteni le.
Kubikwa imbanje zafakwa esikalini zaba lesilinganiso se-307, 568kg njalo zibiza imali engange-R200 000.
Abetheswacala ekubotshweni kwabo bachaza ukuthi imbanje lezi bebezisa eHarare njalo babhadalwa i-US$300 ngamunye kanye lamafutha okuhambisa imota nguJayden owabuye wathi uzabanika ikheli yalapho abazazitshiya khona bangafika eHarare.
Isikhulumi samapholisa eMatabeleland South, uInspector Chiratidzo Dube uchaze ukuthi lokhe besaphenyisisa ngendaba le.
“Indaba yokubanjwa kwamadoda abethwele okudakayo isaphenyisiswa. Sithanda ukubonga uzulu ngokuncweba indlebe ngezigangi ezithwala lokuthengisa izidakamizwa okusiphathisa ukuthi zibotshwe.
“Amapholisa aweMatabeleland South azaqhubeka elinde indawo lapho abantu abangena (Port of entry) eBeitbridge. Sithembisa uzulu osipha imfihlo ngobugebengu obenziwa ngabantu ukuthi ngeke sibachaze emphakathini,” kutsho uInsp Dube.
