Online Reporter
Ethel Ncube
KULEXHEGU elileminyaka engu-71 elidabuka eGaviro, eMasvingo ngaphansi kwenduna uShumba elimiswe phambi komthethwandaba weMasvingo ngeviki ephelileyo ngemva kokubanjwa ngumkalo libhinya ubabhemi.
Umantshi uElizabeth Hanzi uphe umsolwa uMartin Gaviro isigwebo senyanga ezingu-12 zakhitshwa zonke kwathiwa akumelanga adale icala elifanayo eminyakeni emihlanu ezayo.
Umtshutshisi uPrecious Takuva ubike ukuba umsolwa wabanjwa kabili ebhinya ubabhemi esibayeni.
“Umamangala ongunkosikazi kamsolwa uDzivaidzo Gaviro wathi elele ebusuku mhlaka 2 Nkwenkwezi wavuka esiya endlini encane wathi ephenduka umkakhe laye wavuka wayakhona endlini encane. UGaviro wabona sokwedlule isikhathi eside umkakhe engaphendukanga waphuma phandle ethi uyamkhangela wamthola ephathekile ngokubhinya ubabhemi.
“Uthe ngemva kokuthola umkakhe esenza lelihlazo baxolisana kwaba kuhle kwaba njeya kodwa ngemva kwamalanga alitshumi umsolwa wabuyela futhi esibayeni wayabhinya ubabhemi wakhandwa njalo ngumkakhe okwenza wabaleka enqunu.
Umamangala wahamba wayamangala enduneni yona eyathi kahambe emapholiseni,” kubika umtshutshisi uTakuva.
Umsolwa uvumile icala lakhe wathi unkosikazi wakhe kasamniki ucansi yikho enze lelihlazo.
