admin
Thokozile Mbedzi
KULAMADODA amabili eHwange abotshwe ngamapholisa kulandela ukutholakala elempondo zendlovu ezine kuviki ephelileyo.
Amadoda la, uNicholas Joseph Ncube oleminyaka engu-27 loSifiso Ngwenya oleminyaka engu-51 abanjwe elempondo zendlovu esanda kubulawa ngamapholisa ohlangothi lweMinerals Flora and Fauna Unit labeParks and Wildlife Management Authority mhlaka 10 Nhlolanja ngehola lika-6 ntambama.
Kubikwa amapholisa athola udletshana lokuba ababili laba balempondo zendlovu abazithengisayo ngakho badinga ongazithenga.
Kuzwakale ukuba amapholisa afika kulaba ababili bezenza abafuna ukuthenga impondo lezi andubana bababophe.
Isikhulumi samapholisa eMatabeleland North ulnspector Glory Banda uthe amapholisa ahle asukumela phezulu lapho ethola umbiko abopha ababili laba.
“Amapholisa kanye labeParks basukumela phezulu ngemva kokwamukela umbiko wokuba uNcube loNgwenya balempondo zendlovu abazithengisayo njalo badinga abangazithenga.
“UNcube ebona esethole abathengi wasuka eqonda eRunyararo esiyathatha impondo.
Amanye amapholisa agada laye amanye ehla engakafiki kwathi abanye behla buncwadlana lalapho ayesiya khona.
“Omunye umpholisa owayeyehlele bucwadlana loNcube wambona esethwele impondo lezi ezifake phakathi kwesaka elilombala oluthuli wafika wangena emoteni wathi esephakathi amapholisa ayevele esegadile ambingelela aziveza ukuba angobani.
“Wazama ukuthi ehle emoteni ihamba kodwa bahle bambopha kunye loNgwenya owayesele esilindweni samabhasi,” kutsho uInsp Banda.
Uphethe ngokubonga uzulu ngokuncweba amapholisa indlebe ngababili laba.
Online Reporter