admin
Thokozile Mbedzi
ZILOKHU zikhakhamele izakhamizi zeTriangle kulandela ukuzwa ngosane oluleminyaka emithathu okubikwa lubhubhe kuviki ephelileyo kulandela ukugalula echibini ngenxa yokoma.
Kubikwa uPanashe Chimbidzikayi (3) wayesemasimini labazali bakhe wasecela amanzi okunatha kodwa bathi kame bazamupha bangaqeda ukulima indima yabo yena wasesuka waya echibini abakha kulo amanzi lapho afika wagalula khona.
Kuzwakale ukuba unina kamuyi, uMoreblessing Chohuta oleminyaka engu-32 loyise uMunyaradzi Chimbidzikayi oleminyaka engu-35, umntanabo wathi esithi ucela amanzi okunatha bathi basaqedisa ukulima.
Ekhuluma lentatheli kaMthunywa, uNkosazana Memory Moyo uthe lokhe belesithuli ngesenzo sabazali laba sokuthi baqakathekise ukusebenza ukwedlula umntanabo.
“Njengezakhamizi silokudana ukuthi kambe abazali nxa bebezaqakathekisa ukulima ukwedlula impilo yomntanabo kutshoni?
“Umntwana lo kukhanya ngenxa yokuthi wayesome kakhulu wasuka emasimini waya echibini lapho acina esehlangana khona lengozi le.
“Kukhanya engathi loba umntwana lo emncane ubekunanzelela ukuthi abazali bakha ngaphi amanzi laye wasesiya khona echibini lamanzi lapho afika wagalula.
“Abazali bakhe bathe benanzelela ukuthi umntwana kabasamboni yikho abaqala khona ukumdinga bayamthola echibini njalo uyise wenelisa ukumkhupha,” kulandisa uNkszn Moyo.
Isikhulumi samapholisa esabelweni seMasvingo ulnspector Kudakwashe Dewa ebuzwa ngodaba lolu uthe solufikile ehofisini yabo.
“Udaba lomntwana ogalule wafa ngemva kokuba abazali bemncitshe amanzi solufikile ehofisini yethu.
Sixwayisa uzulu ukuthi aqaphele ukuba abantwana bavikelekile zonke izikhathi njalo bangabi lapho abangababoni khona,” kuphetha ulnsp Dewa.
Online Reporter